Meeqqat akuullutillu peqataasutut misiginissartik pisariaqartippaat
Kaattuffinnit kisiartaalluta Kalaallit Nunaanni Danmarkimilu kalaallit meeqqat atugarliortut atugarisaasa pitsanngorsarnissaannik suliaqartuuvugut. Tamatuma kommuninik oqartussaasunillu allanik siunnersuinissamut pisariaqartumik immikkut ilisimasaqalersippaatigut, meeqqat soqutigisaannik pitsaanerpaamik isumaginnissinnaaqqullugit. Suliniutigut aqqutigalugit meeqqap kinaagaluartulluunniit immineerneqannginnissaa sulissutigaarput. Meeqqat naalungiarsuuneriniit tapersersulersarpagut, meeraaneranni inuusuttuunerannilu malinnaavigisarlugit aamma ataatsimooqatigiiffinnut nukittuunut peqataanissaat inersimasunullu aalaakkaasunut attaveqarnissaat isumagisarlugu. Taamaaliornikkut meeqqat akuullunilu peqataanermik toqqissisimanermillu misigitinneqartarput.
Mentorit inuusuttut inersimasutut inuunermut ikaarsaariarneranni tapersersorpaat
Mentoreqartitsisarnermik aaqqissuussineq ’Suluk’ inuusuttunut kalaallinut Danmarkimiittunut ilinniagaqalernissamut sulilernissamullu namminneq aqqutissaminnik nassaarniarnerminni tapersersorneqarnissaminnik pisariaqartitsisunut aaqqissuussineruvoq. Suliniummi anguniagaavoq, kalaallit inuusuttut amerlanerit ilinniakkaminnik naammassisaqartarnissaat aamma suliamut tunngatillugu inuttullu suliffeqarluni inersimasutullu inuunermut nassatarisinnaasaminnik piginnaasaqalernissaat.
Nuan – ilaqutariinnut tamarmiusunut suliniut
'Nuan’ aqqutigalugu ilaqutariit kalaallit Danmarkimiittut ilaqutariittut inuunerannut tamarmiusumut tunngatillugu tapersersorneqartarput. Ilaqutariit periarfissaat pisinnaatitaaffiilu pillugit siunnersortarpagut, pisortanik atuarfinnillu ataatsimeeqateqarnerini najuuttarluta, ilaqutariinnullu ullorititanik allanut attaveqarfigilersinnaasaannik aaqqissuussisarluta. Aammattaarli meeraannarnut sammisassaqartitsisarpugut, pinnguarlutik nuannisarfigisinnaasaannik, ulluinnarisaminnillu allaanerusumik misigisaqarfigisinnaasaannik. Ilaqutariinnut qanimut attaveqarneq meeqqallu ilisarisimallualernerat, tatigeqatigiinnerup pilersinnissaanut aamma ilaqutariit meeqqallu pisariaqartitaasigut naaperiarnissaannut pingaaruteqarluinnarput.
Kommunini sulianik suliaqartunut ilaqutariinnik sullissisartunut paasissutissiineq suliamullu tunngatillugu isumasioqatigiinneq
Kalaallit Nunaanni pissutsit arlallit Danmarkimiit allaaneroqaat, paatsooqatigiittoqarsinnaavorlu meeqqat, inuusuttut ilaqutariillu kalaallit Danmarkimi kommuninit ikiorneqartariaqalerneranni. Isumaginninnermi siunnersortitut kalaallit ilaqutariit, meeqqat inuusuttullu sullinnerannut akisussaasuuguit, tamatigut saaffiigisinnaavatsigut. Piginnaaneqarluarlutillu misilittagaqartunik siunnersuisartoqartitsinerput tassaavoq arlaannaannulluunnit atanngitsumik akeqanngitsumillu neqeroorut, sulianut aalajangersimasunut tunngatillugu nalinginnaasumillu paasititsiniaasussatut – soorlu sulisut ataatsimiinnerini imaluunniit ulloq naallugu aalajangersimasumik sammisaqarnermi - aggersarneqarsinnaasut.
Inersimasutut inuunermut qularani alloriarneq
’Uagut’ tassaavoq inuusuttunut kalaallinut imminnut inissinniapiloortunut siunnerfeqarluartumik suliniut. ‘Uagut’-mi inuusuttut kissaatigisaasa takorluugaasalu oqaasinngornissaannik imminnullu anguniagassaliuunnissaannik tapersertarpagut, kaammattortarlugillu imminut naleqartunik toqqaasarnissaannik.
Sisi – meeqqanut angerlarsimaffimmik avataanut inissitanut attaatsimooqatigiiffik
‘Sisi’ tassaavoq kalaallinut meeqqanut angerlarsimaffimmik avataanut inissinneqarlutik Danmarkimi angajoqqaarsiaqartinneqartunut imaluunniit paaqqinnittarfinniittunut attaveqaat. Meeqqat sapaatip-akunnerisa naanerini naapeqatigiissinnaapput aasaaneraniluunniit tammaarsimaartinneqarlutik, ataatsimooqatigiinnerminnilu immisut atugaqartunik naapeqateqarlutik nuannisaqatigiinnissamut periarfissinneqartarlutik, ilutigisaanillu angerlarsimaffiup avataanut inissitaaneq isummersorfigisinnaallugu. Meeqqat ataasiakkaat toqqissisimanermik ataqatigiinnermillu misiginissaannik kalaallinillu kingoqqisuunerminnik attassiinnarnissaannut periarfissittarpagut.
Siammartoq – inuusuttunik ilinniartitsineq
‘Siammartoq’ tassaavoq kalaallinut inuusuttunut Danmarkimiittunut ilinniartitsinermik ingerlatsineq, tamatumani inuusuttut toqqissisimasumik ataatsimooqatigiiffimmi namminneq nukissarisamik paasilernissaannut aamma namminneq kajumissusertik naapertorlugu sulisut allat atorfeqartitallu peqatigalugit suliniutinut assigiinngitsunut peqataanissaminnut periarfissinneqartarput. Ilutigisaanik inuusuttut ilinniarnermik ingerlanerani namminneq inuttut ineriartornerminni atorsinnaasaminnik pisinnaasaqalerlutillu ilisimasaqalersarput.
Kingunipilutsitsinernik katsorsaaneq
Meeraanermi timikkut tarnikkulluunniit ajoqusigaasimernit kingunipilutsitsinerit inuit ataasiakkaat ingerlanerliornerinik nassataqartarput, ilaqutariinnullu tamanut sunniuttarlutik. Ilaqutariit sulliviat angajoqqaanik, meeqqanik inuusuttunillu ikiorsiisarpoq, ilaqutariinni kinguaariinni arlalinni kingunipilutsitsinerit kipitinneqarnissaannut ilaqutariit iluatsitsisinnaaqqullugit, imminnullu – minnerunngitsumillu meeqqaminnut - tunngatillugu nutaamik pitsaanerusumillu oqaluttuassaqaleqqullugit.
Nutaarsiassat
