Nasat tuniniarnerinit isertitat aningaasaliissutigineqassapput
Kalaallit Meerartaat ilimaginngisamiit aningaasanik tapiiffigineqarput. Tunissuteqartuupput Jesper Rabe Tønnesen aamma Kristian Søgaard Andersen, taakkua nasanik Nu er det Nuuk-imik allagartalinnik tuniniaanermikkut Kalaallit Nunaanni Danmarkimilu inuit akornanni iluatsitsilluarsimapput. Check-i 100.000 kr-nik nalilik tunniunneqarpoq. Tunisaqarneq ingerlaannassappat, suli amerlanernik aningaasaliisoqassaaq, Jesper Rabe Tønnesen oqarpoq.
”Ilimaginngilluinnakkamik pisoqarpoq,” taama oqarpoq Jesper Rabe Tønnesen, Københavnimi Nørrebrogade 7-mi qanganisarpalaartunik niuertarfimmik McKorman-imik piginnittoq. ”Tamakku pilerput, Amerikamiut Kalaallit Nunaannut tunngatillugu oqaaserisartagaat sakkortusiartuinnarmata, uangalu nalunaaruteqartariaqartutut misigisimalerama. Kisianni natsat taama annertutigisumik piumaneqarnissaat, takorluunngisaannaraluarpara,” Jesper oqarpoq.
Jesper ullaaq manna ulapippoq, tassami Skotlandimi tusagassiorfik Jesperimik apersuiniarluni utaqqivoq, pisimasormi Naalagaaffeqatigiinnerup iluaniinnaq sammineqanngilaq. Nasat aappaluttut politikkikkut oqariartuutillit pillugit oqaluttuaq siammaatilertoqaaq, Jesper-ilu nunarsuarmit tamarmit tusagassiuutinit apersorneqartareerpoq, taamaalillunilu franskit, tuluit, Indiamiut Amerikamiullu Jesperi akerliussutsimik takutitsinera maanna malinnaaffigisinnaalerpaat.
Pimoorussinerullunilu quiasaarutaavoq
”Nunarsuup allanngorluinnarnera – ikinngutitta akeranngornerat - ernumaammissutigivara,” Jesper oqarpoq. Iliuuseqarniarluni isummerpoq, kikkunnut tamanut – aamma nutaarsiassanut malinnaasanngitsunut - oqariartuuteqarumallerluni. ”Ikinnguteqarpunga nutaarsiassanut malinnaajumajunnaarnikunik, oqimaappallaartarneri pissutigalugit, tamannalumi aamma uanga misigisarpara, kisiannili nasaq aqqutigalugu quiasaarinertalimmik pissutsit imaannaanngitsut uparuarsinnaavakka. Pasitsaatiinnarparalumi eqquilluarsimalluta, Jesper oqarpoq, isumaqarlunilu ilungersunartoqaraluaqisoq aamma qaamanersaqartoq.
Kalaallit tapersersorpakka
”Pissutsit ilungersunartut pitsaasortaattut taasinnaavarput Danmark, Kalaallit Nunaat Europallu sinnera imminnut qaninnerulermata. Imaanngilaq nunatta siunissami imminnut qanoq attaveqatigiinnissaat pillugu isummernikuugama, kisianni kalaallit Amerikamiut oqartussaasuisa pissusilersornerisa kingunerisaannik siooranartorsiorlutik nalorninartorsiortitaasut tapersersorpakka.” Jesper oqarpoq, paasisimallugulu inuit arlallit nasat assilillugit peqqusersusaarlutik pisut aningaasannanniutiginiarsarigaat.
”Tamanna kusananngilluinnarpoq,” Jesper isumaqarpoq, sapinngisaminillu assiliillutik tuniniaaniarsarisut unitsinniarsarisarlugit.
Tassami aningaasat isertinneqartut kalaallinut meeqqanut inuusuttunullu tunniunneqassasut, Jesper-ip aalajangiussimavaa. ”Matumanimi uanga pineqanngilanga, mannalu iluanaarutiginianngilara. Tamanna siunertaanngisaannarpoq,” Jesper, Kalaallit Meerataannit tunissuteqarniarluni aalajangiussisimasoq, oqarpoq. ”Taamaalilluni aningaasat Danmarkimi Kalaallit Nunaannilu meeqqanut kalaallinut pisariaqartitsisunut atorneqassapput – tamanna isumaqarluarpoq. Tunissutit siulliit tunniunneqalerput, nasallu nioqqutiginerat ingerlaannassappat aningaasat amerlanerit malinnaajumaarput,” Jesper oqarpoq.
Ukunani: McKorman, Nørrebrogade 7, København, Matas, Nuuk imaluunniit Tomato.eu sinneqartoorutit Kalaallit Meerartaannut tunniunneqassapput.
17. januar 2026 Damarkimi illoqarfinni arlalinnni (København, Aarhus, Aalborg, Odense) aamma Nuummi akerliussutsimik takutitsisoqarpoq – Kalaallit Nunaat tapersersorlugu. Jesper Københavnimi peqataasunut natsanik agguaavoq.