Anguniagassatut takorluukkagut, naammasserusutagut aamma meeqqanik isiginneriaaserput

Kalaallit Meerartaanni kalaallit meeqqat inuusuttullu inuunerminni atugarlioqqajaasut inuunerminni atugarisassat malunnaatilimmik pitsanngorsarniarlugit sulivugut.

Kalaallit meeqqat inuusuttullu amerlanersaat ingerlalluarput – Kalaallit Nunaanni Danmarkimilu. Kisianni suli amerlavallaat ulluinnarni inuunerminni annertuunik ajornartorsiuteqarput; meeqqat, inuusuttut ilaqutariillu inuunerminni atugarlioqqajaasut, piffissami sivikinnerusumi sivisunerusumiluunniit. Meeqqat, inuusuttut ilaqutariillu taakku suliniutigut aqqutigalugit tapersersortarpagut.

Anguniagassatut takorluugaraarput, Kalaallit Nunaanni Danmarkimilu kalaallit meeqqat inuusuttullu tamarmik peroriartussasut toqqissisimallutik, ineriartorluarnissaminnut periarfissaqarlutik aamma ilinniagaqarnissaminnut suliffeqalernissaminnullu periarfissaqarlutik.

Naammasserusutagut tassaapput suliniutinik tigussaasunik kalaallinut meeqqanut inuusuttunullu pitsaasumik allanngueqataasunik aallartitsisarnissaq, inunnermi pisinnaasaannik patajaallisaataasunik aamma ilinniagaqalernissamut suliffeqalernissamullu aqqutissiuussisuusunik.

Inuiaqatigiit patajaatsut suliumassuseqarluartullu meeqqat inuusuttullu ingerlalluarlutillu ineriartorluarnissaannut pingaaruteqarluinnartuunerat upperivarput. Meeqqat inuusuttullu inuunnerminni atugarisaannik pitsanngorsaanerit meeqqat najugaanni ulluinnarnilu inuuffigisaanni pilersinneqassapput – ilaqutariinni, atuarfinni, najukkami inuiaqatigiinni il.il.
Taamaammat anguniartuarpartput suliniutinik imminnut napatissinnaallutillu najugaqarfigisamit aallaaveqartunik pilersitsinissaq, kalaallit meeqqat, inuusuttut ilaqutariillu inuunerminni periarfissaannik patajaallisaataasunik.

Meeqanik isiginneriaaserput

Upperivarput meeqqat tamarmik patajaallisarlugillu ineriartortitassaminnik nukissaqarlutillu piginnaaneqartut. Upperivarput meeqqat eqqarsaatigilluakkaminnik aalajangiisinnaallutillu iliuuseqarsinnaasut, tassuunakkullu inuunertik namminneq aqutarilerlugu pitsaasumillu ineriartorsinnaalerlutik.

Inersimasut akisussaaffigaat meeqqat toqqissisimanissaminnut, ingerlalluarnissaminnut ineriartorluarnissaminnullu pitsaasunik sinaakkutissaqarnissaat. Meeraq tassaanngisaannarpoq ajornartorsiut.

Meeraq inersimasut naligalugit pisinnaatitaaffeqarpoq. Tamatuma pisussaaffilerpaatigut meeqqat isiginneriaasiisa, isummmersuutaasa imminnullu paasinerisa ilaatinnissaannut. Aamma pisussaaffilerpaatigut meeqqat inuunerannut attuumassuteqartunik aalajangiinernut peqataatinnissaannut.

Meeqqat siunissap pitsaasup qanoq ittuunissaa pillugu neriuuteqarput, takorluugaqarput kissaateqarlutillu.