Qeqertarsuarmi sapaatip-akunneri nuannerluinnartut
Qeqertarsuarmi aasarsiortitsineq qangali naammassivoq, ulluinnarisarlu atugaaqqilerpoq. Aasarsiortitsinermi assilisat amerlaqaat, filmiliaaqqallu sapaatip-akunnerilu nuannerluinnartut uppernarsapaat. Nunarsuarmit tamarmit namminneq kajumissutsiminnik sulisut Qeqertarsuarmi aasarsiortitsinerup immikkut illuinnartuutinnissaanut peqataapput.
“Qeqertarsuarmi siullermeerluta aasarsiortitsivugut, nuanneqaarlu misigalugu inuit taama amerlatigisut tapersersuillutillu meeqqanik inuusuttunillu pitsaasunik misigisaqartitsiumanerat,” taama oqaluttuarpoq Marianne Hansen, Kalaallit Meerartaanni suliniummi siunnersortaasoq. Naja Nuka 16-inik ukiulik immikkorluinnaq inissisimavoq.
”Meeqqat ilaannut nangaanarsinnaavoq inuit nunanit tamalaaneersut illoqarfimmut tikillutik sammisassarpassuarnik aaqqissuussilernerat. Immitsinnummi takornarpugut ilisariniaqqaartariaqarlutalu. Ilaat ingerlaannaq peqataalersarput, meeqqalli allat nutaarpassuarnut peqataalinnginnerminni toqqissiniaqqaartarput. Tamatumani najukkami namminneq kajumissutsimikkut sulisut pingaaruteqaqaat, Naja Nukalu sunniuteqarluaqaaq. Oqarsinnaavugut Naja Nukap illoqarfimmi meeqqanut inuusuttunullu attaveqarluareernera uagut atorlutigu. Nutserisarpoq, assersuutigalugu pinnguaatinik nutaanik aallartitsigaangatta, toqqissisimanermigullu amerlanerit peqataarusulersittarlugit”.
Simigaq Heilmann Kommune Qeqertalimmi borgmesteriuvoq, Qeqertarsuarmilu najugaqarluni: ”Nuannaarutigivara Qeqertarsuarmi meeqqat immikkut ittumik sammisaqarfiulluartumillu aasarsiornerat. Ilaqutariit tamarmik aasakkut aallarnissaminnut periarfissaqartanngillat, angajoqqaallu arlallit sulisariaqartarput meeqatillu feeriaqatigisinnaanagit, taamaammat aasarsiortitsineq meeqqanut inuusuttunullu qujarunnaqaaq – tassanilu periarfissaqarfiginngisaraluaminnik sammisaqarnissamut periarfissaqarillutik.”
Aasarsiortitsineq tassaavoq peqatigiiffeqarnermik namminerlu kajumissuseq naapertorlugu sulinermik siuarsaanissamut aallarniutaasoq, Qeqertarsuarmilu meeqqat inuusuttullu inuunerminni atugarisaannik patajaallisaasussaq. Suliniut taaguuteqarpoq ’Ikioqatigiinneq’. Taanna pillugu annertunerusumik paasissutissaqarpoq uani.