Narsami aasarsiortitsisoqassaaq
Aasaru nunarsuarmit tamarmit namminneq kajumissutsimikkut sulisut sapaatip-akunnerini marlunni Narsami aasarsiortitsilerpata, illoqarfik pisoqarfioqalunilu assiginngitsunik sammisaqarfiussaqaaq. Aasarsiortitsineq naammassiguni, piffissami sivisuumi suliniummik ’Ikioqatigiinnermik’ nanginneqassaaq.
Narsaq Kommune Kujallermiippoq. Illoqarfik 1300-t missaanni inoqarpoq, taamaalilluni Kalaallit Nunaanni illoqarfiit angissutsimikkut tulleriinneranni qulingiluassaralugu. 2026-mi illoqarfimmi aasarsiortitsinissaq piffissami sivisunerusumi suliniummut ’Ikioqatigiinnermut’ aallarnisaataassaaq.
Kultureqarnermut sunngiffimmullu pisortamik, ilaqutariinnik sullissivimmik, timersortarfimmik, atuarfimmik, meeqqerivimmik klubbimillu ataatsimeeqateqarnerit. Innuttaasunik aataatsimiisitsinerit aamma meeqqanik ataatsimiisitsinerit. Tamakku tamarmik tassaapput aasarsiortitsineq aamma suliniut ’Ikioqatigiinneq’ sioqqullugit ingerlanneqartut. Minnerungitsumik sumiiffimmi innuttaasunik aamma namminneq kajumissutsimikkut
sulisunik suleqateqarneq tunngaviummat, aasarsiortitsineq sioqqullugu angalasarnerit pingaaruteqaqaat.
”Aatsaat aasarsiortitsinermi meeqqat inuusuttullu iluamik ilikkassavagut, kisianni aasarsiortitsineq aamma ’Ikioqatigiinneq’ sioqqullugit angalanitta periarfissippaatigut illoqarfimmi susoqartarneranik aamma meeqqat, inuusuttut innuttaasullu soqutigissaannik paasisaqarnissatsinnut,” taama oqaluttuarpoq suliniutinut inerisaanermullu siunnersorti Marianne Hansen – Narsamut angalasinnarluni uteqqammersoq.
“Ajoraluartumik silarlunnera pissutigalugu Narsamiinnerput pilersaarutaasumit sivikinneruvoq. Tamatuma kinguneraa pilersaarutaasumik ataatsimeeqatissatta tamakkinngitsoornerat, kisianni qujanartumik takkuteqqissaagut, taamaalilluta illoqarfimmi meeqqat, inuusuttut innuttaasullu naapeqatigisinnaallugit piareersaataasussallu tamaasa isumannaarlugit.”
Kommune Kujallermik suleqateqarluarneq
’Ikioqatigiinneq’ maannakkuugallartoq illoqarfinni pingasuni ingerlanneqarpoq: Kullorsuaq, Nanortalik, Qeqertarsuaq, taamaalillunilu Narsaq suliniummut ilaasunut sisammiutissaaq.
” Kommune Kujallermik suleqateqarluarnerput nuannaarutigivarput, Nanortalimmilu ’Ikioqatigiinnerup’ ingerlanneranit misilittagaqarluareerluta. Maanna Narsami inuit nukissallit qanimut suli ilisarilluarnerulernissaat qilanaarivarput. Meeqqanut inuusuttunullu allannguiffiulluartunik suliniuteqartoqareerpoq. Ikioqatigiinneq aqqutigalugu ingerlanneqareersunut peqataalernissarput kissaatigaarput, tapersersorumallugit, meeqqat inuusuttullu suli amerlanerit ataatsimooqatigiinnernut, peqatigiiffinnut sammisaqartitsinernullu peqataasinnaasaleqqullugit,” Marianne Hansen oqaluttuarpoq.