Anne inuusuttunut suliniutinik patajaallisaassaaq
Anne Thisted Kjær inuusuttunut suliniutinik ataqatigiissaarisutut atorfinitsinneqarpoq, Kalaallillu Meerartaasa inuusuttunut suliniutaanik patajaallisaaqataassalluni ilaatigut kalaallit inuusuttut Danmarkimiittut inersimasutut inuunermut ikaarsaalerneranni mentoreqartitsisarnermik aaqqissuussinerup inerisarneratigut.
”Inuusuttutsialaat tamaasa ilisarisimallualernissaat qilanaarivara, ataatsimoorlutalu qanoq tapersersorneqarnissaminnik pisariaqartitsinerannik paasiniaaqatigalugit,” taama oqarpoq Anne, siornatigut ’Meeqqat Ikiortigit’-ni suliniummik aqutsisutut atorfeqarnikuusoq, tassani meeqqanut ilaqutariinnullu qimaasutut misilittagalinnut suliniummik inerisaanermik suliaqarsimalluni.
Sooq Kalaallit Meerartaanni atorfik qinnutigiviuk?
Uannut pingaaruteqartuarnikuuvoq, allanut naleqartunik pilersitsiffiusumik suliaqarnissaq. Ukiut qulit sinnerlugit nammineq kajumissuseq tunngavigalugu isumaginninnikkut suliaqartut sullitarinikuuakka, tamatumanilu ilaatigut inuit atugarlioqqajaasut attaveqalernissaannik kiisalu namminneq kajumissutsimikkut sulisut aqutarinerannik suliaqarnikuuvunga. Tamatuma saniatigut Kalaallit Nunaat kalaallillu kulturiat alutoriuarnikuuakka. Arlaleriarlunga Qeqertarsuup Tunuaniittarnikuuvunga, takornarissanik angallassisutut matrositullu sulillunga. Taamanili Kalaallit Nunaanni pinngortitaq kusanaqisoq inuilu nuannarilluinnalerpakka. Kalaallit Meerartaanni inuusuttunut suliniutinik ataqatigiissaarisutut atorfik inuttassarsiuunneqartoq takugakku, qularinngilluinnarpara uannut naapertuulluinnartuusoq.
Atorfigilikkanni suliassatit pingaarnerit suuppat?
Inuusuttunut suliniutinik ataqatigiissaarisutut atorfinitsitaavunga, tamatumanilu inuusuttunut suliniutitsinnik patajaallisaaqataanissaq suliassaralugu, ilaatigut kalaallinik inuusuttunik Danmarkimiittunik inersimasutullu inuunermut ikaarsaalersunik mentoreqartitsisarluni aaqqissuussinerup nutaap inerisarneratigut. Tamatuma saniatigut inuusuttut malinnaavigissavakka, mentoritaartillugit, taannalu inuusuttut ilinniagaqarnermut suliffeqalernermullu aqqutissaminnik nassaarniarneranni pingaarutilimmik tapersersuisuussaaq. Suliama pingaaruteqartumik ilaatut namminneq kajumissutsimikkut sulisut mentoritut ilinniartissavakka.
Maanna Kalaallit Meerartaanni suliffittaanni atorsinnaasannik suliffinnit suliarisarsimasannilluunniit allanit qanoq misilittagaqarpit?
Ukiorpassuani isumaginninnerup iluani namminneq kajumissutsimikkut suliaqarnermik sammisaqarnikuuvunga, meeqqanut, inuusuttunut ilaqutariinnullu atugarliortunut suliniutinik inerisaallungalu ingerlatsisuunikuullunga. Siusinnerusukkut aamma ilaatigut mentoreqartitsilluni aaqqissuussinernik pilersitsinernik suliaqarnikuuvunga aammattaarlu namminneq kajumissutsimikkut sulisut ilinniartinneri aaqqissuullugillu aqutarisarnikuullugit. Nammineerlunga aamma ukiorpassuarni nammineq kajumissutsinnik sulinikuuvunga, nalunngilara inunnik eqqugaaqqajaasunik nammineq kajumissutsikkut suliaqarneq qanoq kinguneqarsinnaasoq.
Suluk pillugu atuagssat annertunerusut uaniipput