Meeqqat pillugit suliani illersuisoqartitsisarnerit amerleriarujussuarput:
Kalaallit Nunaanni meeqqat inuusuttullu pisinnaatitaaffiisigut ineriartorneq pingaarutilik
Ukiup siulianut naleqqiullugu 2024-mi meeqqat inuusuttullu marloriaammik amerlanerusut kommunimi isumaginninnikkut suliamut ilaalernerminni illersorteqartinneqarput. Tamanna meeqqat inuusuttullu pisinnaatitaaffiisa atuutsinnissaannut naleqqiullugu ineriartorneruvoq nuannerlunilu pisariaqarluinnartoq, Kalaallit Meerartaanni allattoqarfimmi Nuummiittumi pisortaq, Julie Lynge, oqarpoq.
Meeqqanik illersuisoqartitsisarnerup ‘Najorti’ qularnaartarpaa, meeqqat inuusuttullu inunnik isumaginninnermi suliamut ilaalersillutik illersuisoqartinneqarnissaat. 2024-mi meeqqat inuusuttullu 183-it angerlarsimaffiup avataanut inissiisoqarnissaanik suliamut ilaalersut illersuisoqartinneqarput. 2023-mi 87-iupput.
Julie Lynge naapertorlugu illersorteqartinneqartartut taama annertutigisumik amerleriarnerat arlalinnik pissuteqarpoq.
Sulianik suliaqartunut tunaartarisassat ersarissut
“2023-mi novemberimi meeqqanik tapersiisarneq pillugu inatsisip sukaterneqareernerata kinguneraa, kommunini sulianik suliaqartut qaqugukkut Najortit suliamut ilaatinneqalertarnissaat pillugu erseqqinnerusunik tunaartarisassaqalernerat.
Tamatuma saniatigut suliamik suliaqartut illersuisussamik piniarnerminni immersortagaat inerisaqqinnikuuarput. Tamatumalu ilaatigut kinguneraa meeqqap illersuisullu imminnut tulluuttuutinnissaat ajornannginnerulermat.”
Kiisalu Julie Lynge isumaqarpoq Isumaginninnermut Aqutsisoqarfimmik suleqatigiinnissamik isumaqatigiissutip pitsanngorsarnerata kingunerigaa, ‘Najortip’ aannertusiartornera taamaalillunilu meeqqanut inuusuttunullu amerlanernut iluaqutaalernera.
Isumaginninnermut Aqutsisoqarfimmik ukiuni pingasuni atuuttussamik suleqatigiinnissamik isumaqatigiinneq
“Meeqqanik illersuisoqartitsisarnermik aaqqissuussineq patajaallisarniarlugu nunamilu tamarmik atuutsilerniarlugu Isumaginninnermut Aqutsisoqarfik 2024-mi annertusisamik suleqatigivarput. Tamatuma kinguneraa ukiuni pingasuni suleqatigiinnissamik isumaqatigiissuteqarneq, 2028-mut atuuttussaq.”
Isumaginninnermut Aqutsisoqarfimmi immikkut siunnersorti Ida Rasmussen oqarpoq:
”Nunami tamarmi meeqqat sulianut imminnut tunngasunut peqataatinnissaat Isumaginninnermi Aqutsisoqarfimmi pingaartillugu salliutipparput. Isumaginninnermut Aqutsisoqarfimmit Kalaallit Meerartaannik suleqatigiinnissamik isumaqatigiissuteqarneq meeqqanik illersuisartussat nutaat ingerlaavartumik ilinniartinneqarnissaannut qitiulluinnartutut isigivarput, taamaalilluni Kalaallit Nunaanni meeqqat inuusuttullu piginnaaneqarluartumik illersuisoqarnissaminnut periarfissaqaqqullugit. Kalaallit Meerartaannik suleqatigiinnissamik isumaqatigiissutip aammattaaq meeqqat peqataatinneqarnissaasa inerisarlugillu patajaallisarnissaannik ataatsimoorluta nalinginnaasumik anguniagarput pitsanngorsarpaa.”
2024-mi illersuisartussat nutaat arfineq-pingasut Upernavimmi Maniitsumilu ilinniartippagut, ukioq mannalu Tasiilami, Narsami, Qasigiannguani Uummannamilu illersuisartussanik nutaanik ilinniartitsissaagut. Maannakkorpiaq illersuisartut 49-t illoqarfinni nunaqarfinnilu assigiinngitsuni sulipput.”