Aarhusimi sapaatip-akunnerisa naanerini angalaartarnerit, nereqatigiittarnerit meeqqanullu klubbi

Anne Bruun suliniummi ’Nuan’-imi Aarhusimi meeqqanik ilaqutariinnillu ilitsersuisartutut atorfeqarpoq. Inunnik ataasiakkaanik tapersersuinerup, illersuinerup ilaqutariinnullu pulaartarnerup saniatigut, Anne aammattaaq attaveqatigiiffiit patajaatsut pilersinneqarlutillu nuannersuni ataatsimoorluni misigisaqarnissap pingaartinneqarfigisaannik sapaatip-akunnerisa naanerini angalanernik, meeqqanik ilaqutariinnillu sammisaqartitsinernik nereqatigiinnernillu aaqqissuussisarpoq.

Uannik kajungilersitsisartut pingaarnersaraat, meeqqat ilaqutariillu inuunerannik allanngueqataasinnaaneq. Alloriarnerit annikitsunnguugaluartut annertuumik ineriartuutaasinnaanerisa ingerlallualissutaasinnaanerisalu misigisarnerat uannut ulluinnarisannik isumaqarlualersitsisarpoq. Aamma qilanaarivara sammisaqartitsinerit nuannersut inunnut ataasiakkaanut ataatsimooqatigiinnullu ineriartuutaasinnaasut pilersikkiartuaarnerannut peqataanissara.

Sooq Kalaallit Meerartaanni atorfininnissat qinnutigiviuk? 

Kalaallit Meerartaanni atorfik qinnutigivara, ingerlallualersitsinissamik suliaqarlunga nuannarisaqartuuninnut naapertuulluinnartuummat aamma kissaatigigakku meeqqanik ilaqutariinnillu tapersersuinissara, tassuunakkullu neriunartumik allanngueqataasinnaagama. Attaveqalersitsissutaasumik suliaqarneq inunnillu maanna sumiiffigisaanni naapitsinissaq soqutigisarivakka – qanitaralugit, suliamik ilisimasaqartutut sullillugit, ataqqillugit akuersaarlugillu. Uannut pingaartuuvoq kulturimik paasinninnerup assigiinngissutsinillu akuersaarnerup aallunneqarfigisaanni sulinissaq, tamatumanilu uanga sinaakkutissanik toqqissinartunik pilersitseqataanissara aamma inuttut ineriartornermik ataatsimooqatigiinnermillu tapersersuillungalu annertusaaqataanissara. Atorfimmik inuttassarsiuussineq takugakku qamuuna misigivunga, takorloortuartakkanni sulinissara maanna ammaanneqarluni periarfissinneqalersoq. Kalaallit Meerartaanni suleqatigiinnut ilaalernera annertuumik iluatsitsinertut isigivara qujamasuutigeqalugulu.

Atorfigilikkanni suliassatit pingaarnerit suuppat? 

Suliassama pingaarnersaraat meeqqanik ilaqutaannillu tapersersuillungalu ilitsersuisarnissara, oqaloqatigiinnerit, angerlarsimaffinnut pulaarnerit ataatsimoorlunilu sammisaqartitsinerit aqqutigalugit. Sinaakkutissanik toqqissisimanarlutillu ineriartuutaasunik, meeqqat ilaqutariillu pisinnaasaqarluarnermik, attaveqartutut ingerlalluartutullu misigisaqarfigisinnaasaannik pilersitseqataassaanga. Sapaatip-akunnnerisa naanerini angalaaqatigiinnerit, nereqatigiinnerit, meeqqanut klubbeqartitsineq katerisimaaqatigiiffiusullu allat aaqqissuunnissaat isumagisassavakka.

Maanna Kalaallit Meerartaanni atorfigilikkanni atorsinnaasannik siusinnerusukkut suut misilittagaqarfigivigit, suut suliffigisarnikuuvigit allatulluunniit suliaralugit?

Tamatigoortunik tunuliaqutaqarpunga ilinniartitsisutut, ingerlalluarnissamik ilitsersuisutut aamma qallunaat oqaasiinik oqaatsit aappaattut ilinniartitsinermik ilitsersuisutut. Tamakku saniatigut ukiuni arlalinni nammineq kajumissusera naapertorlugu sulisarnikuuvunga. Nammineq kajumissutsikkut sulininni pingaaruteqartuarnikuupput sammiuartarnikuuvakka meeqqanik ilaqutariinnillu inuunerminni atugarlioqqajaasunik isumaginninnermi perorsaanikkut sullissineq.

Sulininni meeqqat ilaqutariillu pisariaqartitaat assigiinngitsut misilittagaqarfigillualernikuuakka, taakkualu qanoq ulluinnarni ataatsimooqatigiiffinnilu ineriartorfiusuni aallunneqarlutillu ikorfartornissaat. Meeqqat ilaqutariillu kulturinit assigiinngitsorpassuarneersut sullittarnikuuakka, taamatullu sulineq pissangnartutut isigivara. Naaperiartarpakka ammasumik maniguullungalu.

Aamma iluatsitsinikkut Kalaallit Nunaanni pinngortitarsuaq naliitsoq misiginikuuara, inuit nuannersut naapinnikuullugit kalaallillu kulturiat paasisaqarfigalugu, ilinniartitsisutut sungiusarlunga Kalaallit Nunaanni sulinerma nalaani.