Kammagiit Ivy aamma Pilunnguaq
Meeqqat atuarfiat naammassigukku Danmarkimut efterskoleriarusuppunga, kingornalu GU-llunga nunatsinni. Suli efterskole sorlermiissanerlunga aalianginngilara toqqagassat amerlanermik. Kisianni nalunngilara timersornermik aallussisuniikkusullunga.
Kammalaatigullu ataatsimuukkajuppugut. Unnukkut illoqarfimmi pisuttuartarpugut. Amerlagaangatta nuannernerpaasarpoq sammisaqaqatigiilluta. Pisuttuaraangatta misigisimasagut assigiinngitsut oqaluusererujoortarpagut.
Klubbemiikkaangatta nerrivimmi arsaarartarpugut, imaluunniit arsaararluta. Aamma ilaanni Partnerserlutalu Kalahartarpugut.
Ivy Rohde, 13-inik ukiulik
Atuaqatigiinni 8. -9. klasseni ataatsimoortuni 8. klassertaani atuartuuvunga. Maajimi 14-iliissaanga apersortittussaallungalu. Ilaquttakka pikisupilussuullutillu pissangapput, uanga qilanaarpianngilanga.
Anaanaga qatanngutikka ataatarsiaralu blokkini najugaqatigiippugut. Qatanngutinni qatanngutissannilu angajullersaavunga niviarsiarartatuaallungalu. Katillugit pingasunik aqqaloqarpunga.
Atuareeraangama ningiukkuliartarpunga. Ningiukkunniillunga nuannarivara. Ningiup qimmia ilagalugu aneeqatigalugulu nuannarisarpara, uanga nammineq qimmeqanngilanga allallu qimmii ersigisarlugit. Kisianni ningiukkut qimmiat ersiginngilara, ilagalugulu nuanneralugu toqqissisimanaralugulu.
Sunngiffinni arsartarlungalu nipilersuutinik tusarnaarneq nuannaraara. N-85-ikkunni niviarsiaqqani arsartartut U15-iannut peqataasarpunga. Sungiusaraangatta qulit missaanniittarpugut. Sapaatip akunneranut marloriarluta sungiusartarpugut. Sisamanngornikkut arfininngornikkullu, amerlanertigut arfernup qeqqanut. Kisianni ilaannikkut tallimap qeqqanoortarpugut. Kissasseriarluta arsalerisarpugut. Ilassatsinnik toqqaareeraangatta unammisarpugut. Siornatigut bordtennis aamma sulorarneq aallunnikuugaluarpakka, kisianni kisimiilluni timersoriaatsit nuannarerpiarnagit paasigakku unitsippakka. Nuannarinerusarpara iligiiaarluta arsaakkaangatta.
Meeqqat atuarfiat naammassigukku Danmarkimut efterskoleriarusuppunga, kingornalu GU-llunga nunatsinni. Suli efterskole sorlermiissanerlunga aalianginngilara toqqagassat amerlanermik. Kisianni nalunngilara timersornermik aallussisuniikkusullunga.
Kammalaatigullu ataatsimuukkajuppugut. Unnukkut illoqarfimmi pisuttuartarpugut. Amerlagaangatta nuannernerpaasarpoq sammisaqaqatigiilluta. Pisuttuaraangatta misigisimasagut assigiinngitsut oqaluusererujoortarpagut.
Klubbemiikkaangatta nerrivimmi arsaarartarpugut, imaluunniit arsaararluta. Aamma ilaanni Partnerserlutalu Kalahartarpugut.
Pilunnguaq Dorph, 13-inik ukiulik
Uanga aamma aasamut apersortissaanga. Ivy maajimi uanga julimi. Nammineq apersortiffissatta ullui toqqarnikuuagut. Apersortinnissannut qilanaarpunga, aamma pikisunut peqataallunga nuannaraara.
Anaanaga qatanngutikkalu illoqatigaakka. Qatanngutigiinni angajullersaavunga marlunnillu aqqaloqarlunga. Ivytulli qatanngutigiinni niviarsiarartatuaavunga.
Klubbimiinnerusalernikuuvunga. Siornatigut aneernerusaraluarama kammalaatikkaluunniit pulaarlugit, massakkut klubbimiinnissara nuannarinerulernikuuara. Sulisut suliartortuaannarput nuannersunillu assigiinngitsunik sammisassaqartitsiuaannarlutik. Ilaannikkut aamma turnerinngertitsisarput. Soorlu pool, nerrivimmi arsaararneq imaluunniit arsaararneq. Turnerinngertoqaraangat peqataarusuttut tamarmik ilaasarput, taamaalilluta ataatsimoortarpugut. Ilaannikkut aamma pisuttuaqatigiittarpugut. Tamatta immikkut sammisaqarnata ataatsimoorussaqartarnerput uanga nuannarisarpara.
Atuareeraangama klubbimukanngikkaangama ikinngutikka ilagisarpakka. Uagutsinni aamma ikiuuttarpunga, Anaana allanik pisassaqaraangat nukarlersarput ilaanni meeqqanut aasarpara. Aqqaluara meeqqanut aallugu nuannaartuaannarpoq, taamaattumik aallertarnera nuannaraara.
Narsamiittuaannarnikuugama Danmarkimi efterskolerusukkaluarpunga allanik misigisaqarniassagama. Kisianni timersornermut efterskolemiikkusunngilanga seeqqulukkama timersorsinnaanangalu.
Meeqqat mikisut nuunooqqallu ilagissallugit nuannarisaraakka. Inersimasunngoruma meeqqerivimmi sulilerusussinnaavunga.