Alloriarnerit annikitsut annertuumik nikeriartitsisarput
Evi Kreutzmann Nuummi allattoqarfimmi suliniutinut inerisaanermullu siunnersortitut atorfeqarpoq, peqatigiiffiup suliniutillu ersarinnerulernissaannut peqataassalluni, ilaatigut attaveqaqatigiinnermi aalajangersimasunik suliaqarnermigut. Evi-mut suliaq aamma meeqqanik inuusuttunillu sullissineq tassaapput ullut tamaasa suliartornissamut kajumissuseqalersitsisuusut.
”Meeqqanik inuusuttunillu sullissineq uannut pingaaruteqaqaaq. Ilikkagassatigut inuttullu ineriartornerinut peqataasinnaatitaagaanni, immikorluinnaq ittumik pisoqartarpoq. Meeqqat nutaanik pisinnaasaqalernerminni inuttut ineriartornerat alliallannerallu ersarittarpoq, tamakkuuppullu uanga sulininni pissarsiffigisartakkakka.
Nuannarinerpaasama ilagaat, meeqqat inuusuttullu ingerlaannaq qisuarirtarnerat. Toqqaannarnerusarput – suut sunniuteqarluarnersut qaqugukkullu suut allannguutaanersut malugilertorneqarsinnaasarput. pilertortumik malugineqarsinnaasarput. Unneqqarissumik toqqaannartumillu qisuariaateqarnerup suut tamaasa uummaarinnerulersittarpaat piviusorpalaarnerulersillugillu, tamannalu ulluinnarni immikkut ittumik ingerlaavartitsilersarpoq.”
Ineriartorneq takusinnaallugu – alloriarnerit annikitsut nikeriarnerujussuarnik pilersitsisartut – tamakkuupput uannik kajumissuseqalersitsilluartartut. Tassuunakkut eqqaasinneqartarpunga, suliagut pingaaruteqartuusut. Meeqqami inuusuttumiluunniit allanngueqataasimaneq malugalugu -ilikkagassatigut, inooqataanikkut pisinnaasatigut imaluunniit toqqissinartumik sinaakkusiinikkut - suliaq isumaqarluartutut qamuuna misinnartarpoq.
Ajugaanerit annikikkaluit pingaaruteqarluinnarput
Ukiuni kingullerni qulini Evi sisorartartut peqatigiiffianni NSP-mi nammineq kajumissutsiminik suleqataasarpoq. Tassani pingaartinneqarpoq sisorarnerup iluani meeqqanik inuusuttunillu sammisassaqartitsinissaq, aammattaarli pingaartinneqarluni ataatsimoortitsilluni aammalu inuusuttunik imminnut upperinnilersitsisunik.
”Anguniarnikuuara inuusuttut timikkut piginnaaneqaliinnaratik aammali eqqarsartaatsimikkut misigissutsimikkullu ineriatornissaat. Takusarpakka ulluinnarni ajugaasimaarneritannikikkaluit – timersornermi inuttulluunniit sammisaqarnermi - inuusuttup imminut isigineranut periarfissaminnillu takunnissinnaalernissaannut qanoq sunniuteqartartigisut.”
Suliniutit tamarmik immikkuullarissumik tunniussaqartarput
Nuummi allaffimmi suliassat assigiinngisitaaqaat. Taamaanneralu Evip Kalaallit Meerartaanni sulinermini nuannaarutigisaasa ilagaat.
”Assigiinngisitaartunik suliaqarnermut pingaaruteqartutut isigivara. Suliniutit tamarmik immikkut tunniussaqartarput – nikeraraluarlutillu assigiiffeqarput, uagutsinnik ataqatigiilersitsisunik. Tamatuma kinguneraa ulluinnarisat nikerarlutillu ilisarnartuusarneri. Suliniutit sineriammut tamarmut siammaassimasuunerat aammattaaq immikkut isiginiagassaavoq – kinguneraami sumiiffiit tamarmik immikkut inissisimaffeqartarmata tamarmillu immikkut unammilligassaqartarlutik, tamatumalu suliaq suli pissangananerulersiinnartarpaa.”