Kalaallit Meerartaanni periusissiaq nutaaq: 2030-p tungaanut ima sulissaagut
Kalaallit Meerartaat nutaamik periusissioqqammerput. Kisianni periusissiaq sumut atorsinnaava, aamma suna pissutigalugu sulinermi toqqammavissatsialaava? Kalaallit Meerartaanni siulittaasoq Thomas ”Tyt” Mogensen aperivarput, sooq periusissiaq pingaaruteqarnersoq – qinnuigalugulu 2030-p tungaanut nalerassat pingaarnerit erserseqqullugit.
Kalaallit Meerartaanni sulissutigivarput meeqqat inuusuttullu kalaallit - inuunerminni atugarlioqqajaasut – inuunerminni atugarisaasa pitsaanerulersinnissaat. Tamanna tunngavimmigut suliassaavoq annertooq, anguniagarlu assigiinngitsunik periuseqarluni anguniarneqarsinnaavoq, Thomas ”Tyt” Mogensen oqarpoq.
”Periusissiaq ataatsimoorluni anguniagassanut toqqammavissatut taaneqarsinnaavoq, uagut peqatigiiffittut aqqutiginiakkatut toqqarsimasatsitut, isumaqaratta taamaaliornikkut annertunerpaamik allanngueqataasinnaalluta.
Periusissiaq aallaqqaataaniilli periusissiaasumik toqqammaveqarpoq, taannalu peqatigiiffimmut ukiunilu kingullerni tallimani suleriaatsitsinnut sinaakkusiilluarnikuuvoq. Taamaammat sammivipput annertuumik allanngortinneqanngilaq, akerlianilli piffissaq atorlugu 2030-p tungaanut ersarinnerusumik qanoq suleriaaseqarnissatta nassuiarnissaanut.”
Kalaallit Meerartaasa periusissiaanni allannguinissamik anguniakkat sisamat tunngaviupput. Allannguinissamik anguniakkat takukkit uani.
Ukiut inuusuttuunerup nalai mianerisassaapput
Pingaartillugit isiginiakkatta ilagaat ukiut meeqqat inuusuttunngulerlutik toqqaasussanngulerfii, toqqagassat annertuutut qaangeruminaatsutullu isikkoqarsinnaasut, nalunngisatsitulli inersimasutut inuulernissaannut pingaaruteqarluinnartut.
”Ukiuni kingulliunerusuni inuusuttunik sullissinerput patajaallisarnikuuarput. Tamannalu periusissami nutaami aamma pingaartillugu isiginiarparput. Ukiut inuusuttuuffiit inuusuttunut ilaqutariinni inuunerminni atugarliuteqartuni peroriartortunut immikkut artornartuusinnaapput. Tupinnanngitsumik misigisarput allanit annertunerusumik nammineertariaqarlutik, amerlasuulli ajorsartitaasutut inorsartitaasutullu misigisarsimasaminnit sunnigaasarput. Aamma meeraanerminnit misigisarsimasaminnik suliarineqarnikuunngitsunik kingunipilutsitsisinnaapput, tamakkualu ilaannut kingunerisarpaat unittoorneri imaluunniit ilinnialernissaminnik sulilernissaminnilluunniit ajornakusoortitsilerneri. 2030-p tungaanut periusissiakkut inuusuttut ukiuni inuusuttuuffiini sivisunerusumik ataavarnerusumillu tapersersortarniarpagut, ilinniagaqalernissaat suliffeqarnissaallu qitiutillugit.Kalaallit Nunaanni inuusuttut akornanni ingerlalluarnissaq iliuuseqarsinnaassuseqarnissarlu patajaallisarniarpagut, suliniutitta meeqqat atuarfianni siammaannerisigut aamma sumiiffinni ataasiakkaani suliniutitsinnut inuusuttut peqataatinnerisigut.”
Ingerlatsisut allat suleqatigalugit sunniuteqarsinnaassuserput annertusarneqassaaq
2030-p tungaanut periusissiatsinni sammisassaq pingaarutilik tassaavoq suleqateqarnerup suleqatigisartakkallu pingaartillugit isiginiarnissaat. Tamanna Kalaallit Meerartaanni nalinginnaasumik pikkoriffigivarput, siulittaasoq Thomas ”Tyt” Mogensen oqaluttuarpoq- tamannalu 2030-p tungaanut suli pingaaruteqarnerulissaaq.
”Qangali misilittagaqarfiginikuuarput ilisimasagut allanut ingerlateqqikkaagatsigit, ingerlatsisullu imaluunniit immikkut ilisimasallat – suliniutitsinni tamatiguussutsimik sunniuteqarluarnissamillu qularnaarisinnaasut – suleqatigalugit annertuumik iluaqutaasartoq. Taamaaliornikkut kalaallinut meeqqanut, inuusuttunut ilaqutariinnullu naapertuunnerpaanik pitsaanerpaanillu neqerooruteqarsinnaavugut.”
Periusissiarput pillugu annertunerusumik paasissutissaqarpoq uani.