Ilikkariatornerup ataatsimooqatigiinnerullu kalaallit inuusuttut ilinniagaqalernissamut sulilernissamullu ikorfartorpaat
Ataatsimooqatigiinneq aamma assersuutigalugu suleqatigiinnissap, inuunermi piginnaaneqarnissap aamma kalaallit kulturianni nakuussutsit pingaartinneqarneri ilinniartitsitsilluni ingerlatsinermi ’Siammartumi’ tunngaviupput. Aningaasaateqarfik ’Den A.P. Møllerske Støttefond’ 2 mio. Kr.-nik tapiissuteqaqqammerpoq, kalaallit inuusuttut Danmarkimiittut ilinniagaqalernissamut suliffeqalernissamullu tapersersorniarlugit suliniummik inerisaalluni ingerlatsinissanut marlunnut.
Suliniut ’Siammartoq’ Danmarkimi kalaallinik inuusuttunik ilinniartitsilluni ingerlatsineruvoq. Peqataasut ataatsimooruppaat, maanna inuunerminni killiffimminni siunissaminnut pingaaruteqartumik aalajangiisussanngornertik.
” Siammartoqanngitsuuppat perorsaasunngorusunnera paasisimanavianngikkaluarpara. Ukiup aappaa affaq uanga inuuninni ’Siammartoq’ tassaavoq aalaakkaassusilik; uannut annertuumik ikorfartuutaavoq. Tamannalu pisariaqartippara. Ilagisartakkannit ikorfartorneqarlungalu tapersersorneqarnikkut imminut naleqartilerpunga imminullu upperilerlunga,” taama oqaluttuarpoq inuusuttoq ilinniartitsilluni ingerlatsinerit siuliini peqataanikuusoq.
Ilisimasaqarneq ataatsimooqatigiinnerlu iliuuseqarsinnaanermik pilersitsisarput
’Siammartuni’ ingerlatsineq ukiunik marlunnik sivisussuseqarpoq, piffissamilu tassani inuusuttut sapaatip-akunnerisa naaneranni ilinniartitsinermik ingerlatsinernut arfineq-pingasunut naapeqatigiittarput. Tassani qanimut attavittaartornissaq inissaqartinneqarpoq, ilutigisaanillu inuusuttut tamarmik immikkut ulluinnarni unamminartitarisartagaannik sammisaqartoqarsinnaalluni.
”Siammartumut peqataasartut arlalitsigut inuunerminni ajornakusoortitaminnik killiffeqarsinnaasarput, assersuutigalugu peroriartornerminni misgisarsimasatik imaluunniit Danmarkimi kalaallit pillugit isummereertarnerit pissutigalugit. Taamaammat sapaatip-akunnerata naanerani ilinniartitsinitsinni pingartillugit sammisarpagut nammineq killissarisat allallu killissarisaannik malussarsinnaanissaq, atugarlioqqajaanerup illuanut saatillugu nakuussutinngortinnissaa aamma inuusuttut takorluugaasa piviusunngortinnissaannut aqqutissaasinnaasut qulaajarnissaat. Qanimut ataqatigiinnerup oqaloqatigiittarnerpassuillu pingaarutillit inuusuttut sapiissuseqarnerulersillugillu iliuuseqarsinnaalersittarpaat, ulluinnarisaanni nukittunerulersillugit,” Jeanne Funch Asmussen, Kalaallit Meerartaasa Danmarkimi suliniutaannut pisortaasoq oqaluttuarpoq.