Meeqqat tussaneqartutut, toqqissisimasutut peqataatinneqartutullu misigissapput
Nuka-Dorthe Petrussen Nuummi allattoqarfimmi suliniutinut inerisaanermullu siunnersortitut atorfinippoq: “Allanngueqataasinnaanera kajumissaatigisarpara – annermik takusinnaagaangakku meeqqat tusaaneqartutut, toqqissisimasutut peqataatinneqartutullu misigisimasut.”
”Kalaallit Meerartaasa kalaallit meeqqat toqqissisimanissaannik, ilinniagaqarnissaannik periarfissaqarnissaannillu qularnaariniarlutik anguniagaat, uanga nammineq pingaartitannut sulininnilu isiginiartakkannut naapertuulluinnarpoq. Suliniutinut inerisaanermullu siunnersortitut atorfik nammineq piginnaasaqarfigisama allanngueqataanissamut atorluarnissaannut periarfissatsialattut isigivara.”
”Meeqqanik inuusuttunillu sullissinitta patajaallisarnissaanut ilinnartitsinerit ilinniutillu nutaat inerisarnissaat aallutarissavakka, annermik persuttaasarneq akiorniarlugu suliniutitsinni ’Tassa!’-mi, aammattaarli meeqqanik illersuisoqartitsisarnermik aaqqissuussinitsinni ’Najorti’-mi suliaqartassaanga. Suliassakka assigiinngisitaartussaapput, ilaatigullu ilaassapput angalanernik pilersaarusiornerit, ilinniartitsinissanik sammisaqartitsinissanillu pilersaarusiornerit, sulianik ataqatigiissaarineq takkuteriasaartunillu assigiinngitsunik suliaqarneq,” Nuka-Dorthe oqaluttuarpoq.
Inimi klassip atuarfiani taassumalu avataani meeqqat ingerlalluartariaqarput
Ilinniartitsisutut ilinniarsimanini, ilinniartitsinermik, ulloq unnuarlu paaqqinniffinnit Kalaallit Nunaannilu takornariaqartitsinermit misilittagaqarnini tunngavigalugit Nuka-Dorthe suliamut tunngasunik inuttullu piginnaasaqarluarnini akuleriisillugit atorfittaaminut naassatarivai. Assigiinngitsorpassuartigut meeqqanik inuusuttunillu sullissisarnikuuvoq – meeqqallu ingerlalluarnissaat ineriartorluarnissaallu immikkut soqutigisaralugit – inimi atuarfiusumi taassumalu avataani.