Allattoqarfiup pisortassaanik naleqartitat tunngavigalugit meerartattalu siunissaannik siunnerfiliisinnaasumik pissarsiorpugut

Meeqqat inuusuttullu tamarmik isumassorneqarnermik, ataatsimooqatigiinnermik periarfissanillu tunineqarnissaat Kalaallit Meerartaata sulissutigaa. Atassuteqarnerit nukittuut, iliuuseqarnerit ataavartut najukkanilu suliniuteqarnerit sunniuteqarluartut meeqqat inuusuttullu inuunerminni pitsaasunik atugaqarnissaannut qulakkeerinneqataasinnaanerat upperaarput.

Kalaallit Meerartaat NGO-tut suliniuteqartuuvoq iluanaarniarfiunngitsoq. Tamakkiisumik isiginnittumik sulivugut, suliatigut qaffasissumik pitsaassusilimmik inunnullu aamma najukkani inuiaqatigiinnut suleqatigisatsinnut tunniusimalluinnartumik suliniuteqartuulluta. Allattoqarfimmi pisortatut taamatut suleriaaseqarnerup aaqqissuussaanermi sulianut tamanut sunniuteqarnissaa naleqartitattalu ulluinnarni sulinermi tigussaasunngortinneqarnissaa qulakkeertussaavat.

Allattoqarfik tunniusimasunik pikkorissunik tallimanik sulisoqarpoq. Allattoqarfimmilu pisortatut ulluinnarni aqutsineq akisussaaffigissavat generalsekretæri toqqaannartumik attaveqarfigalugu. Atorfik Nuummi inissisimavoq inuiaqatigiillu kalaallit pillugit paasisimasaqarluarnissaq pisariaqarpoq.

Suliatigut piginnaaneqarfigisat

Aqutsinerup aaqqissuussaanikkullu ineriartortitsinerup iluanni misilittagalimmik aqutsisussarsiorpugut, aaqqissuussaanermi anginngitsumi ilusiliisinnaasumik, siuariartortitsisinnaasumik erseqqissumillu siunnerfiliisinnaasumik, peqatigisaanillu ulluinnarni aqutsinermi eqeersimaarluni suleqataasinnaasumik.

Siuttuullutillu suliassanik akisussaaqataasassaatit. Aaqqissuussaanermi aqutsinerup ingerlatsinerullu ataqatigiiffigisaanni sulineq sungiusimassavat aammalu periusissiukkamik ingerlatsinermik sulisinnaassallutit.

Suliniutinik aqutsinerup iluani piginnaaneqarluassaatit aammalu pilersaarusiornermi, ingerlatsinermi nalunaaruteqartarnermilu pitsaassutsimik qaffasissumik qulakkeerinnittuullutit. Aaqqissuulluakkamik ilusilersukkamillu suleriaaseqassaatit, ataatsimut isiginnissinnaassuseqarlutit tulleriiaarillaqqissuullutillu, aamma suliassat amerlasuut ataatsikkut ingerlassinnaallugit.

Allattoqarfimmi pisortatut sulininni pingaarutilimmik inissisimasussaq tassaavoq suliniaqatigiiffiup inuiaqatigiinni saqquminerata nukittorsarnissaa, taamaaliornikkut suliniutitta oqariartuutittalu sapinngisamik annertunerpaamik sunniussinnaanerat qulakkeerumallugu. Sassarlutit misilittakkatsinnik oqariartuutitsinnillu tusagassiutini saqqummiussinissamut suleqatigisatsinnillu oqaloqateqarnissamut kajumissuseqarnissat pisariaqarpoq.

Aqutsisutut sulisut sunik piginnaaneqarfeqarnerat takusinnaassavat ineriartortitsillutillu pisinnaasaasalu suliassat naammassinissaannut eqeersimaartumik isumaqarluartumillu atorneqarnissaat qulakkeerlugu. Sinaakkutissanik, ataatsimooqatigiinnernik pimoorussinernillu erseqqissunik pilersitsisarputit, aamma kulturimik akisussaassuseqarnermik, suleqatigiinnermik suliatigullu qaffasissumik pitsaassusilimmik ilisarnaateqartumik ikorfartuisuussaatit.

Aningaasaqarnermik aqutsineq aamma fundraising misilittagaqarfigivatit, taamatuttaarlu aningaasaateqarfinnut qinnuteqaasiorneq aamma nalunaaruteqartarneq, aammalu uppernarsaasiornermi ammasumik suleriuseqarnissaq pitsaasumillu ingerlatsinissaq suliniaqatigiiffiullu naleqartitaanut siunertaanullu naapertuuttumik atasinnaasumik ingerlatsinissaq qulakkiissavat.

NGO-tut suliniuteqarnerup misilittagaqarfiginissaa iluaqutaassaaq, aamma meeqqanut inuusuttunullu siunnerfilimmik suliniuteqarnermik misilittagaqarneq pingaartinneqassaaq.

Naalakkersuinikkut pissutsit paasisimasaqarfigivatit qaffasissutsinilu tamani suliatigut pikkorissusilimmik suleqatiginnissinnaallutit – sulisunit siulersuisunut aamma ingerlatsisunit namminersortunit pisortanut aammalu suleqatigisartakkanut allanut.

Kalaallisut danskisullu oqaluttariarsornikkut allattariarsornikkullu qularnaatsumik suliatigullu pikkorissusilimmik attaveqaqateqarsinnaanissat piumasaqaataavoq.

Inuttut piginnaaneqarfigisat

Aqutsisutut ersarissuliortuuvutit, tatiginnilersitsisuullutit paasinnittuullutillu. Suleqatigiinni toqqissisimatitsillutillu ataqatigiinnermik pilersitsisinnaavutit peqatigisaanillu pisariaqartillugu siunnerfiliillutillu aalajangiisinnaassuseqarlutit.

Erseqqissumik ataqqinnittumillu attaveqaqateqartarputit suliaqarfiillu akimorlugit suleqatigiinnernik atassuteqarnernillu pilersitsisinnaallutit. Aaqqissuulluakkamik suleriaaseqarputit ulluinnarnilu sulinermi ulapiffiusumi eqqissisimasinnaallutit.

Meeqqanut inuusuttunullu allanngueqataanissaq ilinnut kajumilersitsisuuvoq aamma NGO-mi aqutsinerup suliatigut paasisimasaqarnissamik inunnullu paasisimasaqarnissamik pisariaqartitsinera ilisimaaralugu.

Sulinermi avatangiisinik piviusorsiortunik sulinermilu nuannaarfiusunik pilersitseqataassaatit soorunamilu aamma qungujunnartunik suleqatigiinnermi pissusissamisoortumik inissaqartitsillutit.

Neqeroorutigaagut

Aqutsisutut atorfik pingaarutilik annertuumik sunniuteqaqataaffiusoq aammalu generalsekretærimik siulersuinillu qanittumik suleqateqarfiusoq.

Sulinermi avatangiisit tatiginninnermik, akisussaassusermik suliatigullu tulluusimaaruteqarnermik ilisarnaatillit aammalu anguniakkanut inoqatinillu pingaartitsinermut inissaqartitsisut.

Ulluinnarni sulineq assigiinngiiaartunik suliaqarfiusoq, aamma ingerlatsinermut, ineriartortitsinermut suleqatigisartakkanullu qanittumik suliaqarfiusoq.

NGO-mi naleqartitat tunngavigalugit suliniuteqartumi inuiaqatigiinnullu sunniuteqartumi aqutsisutut suliavit nukittorsarnissaannut periarfissaqarneq.

Piginnaasat malillugit akissarsiaqartitsisoqarlunilu atorfeqarnermi atugassaqartitsisoqassaaq.

Qinnuteqarfissaq kingulleq tassaavoq ataasinngorneq 6. apriili 2026 nal. 12.00

Soqutiginartippiuk?

Atorfik pillugu apeqqutissaqaruit Flies HR-imeersup Partner Dorthe Fliesip mobilimut +299 583117-imut imaluunniit e-mailikkut dorthe@flieshr.dk-mut attaveqarfiginissaanut tikilluaqqusaavutit.

Flies HR sulisussarsiornermik isumaginnittuuvoq, taamaammat saaffiginnissutit tamaasa tassunga ingerlateqquneqarput. Qinnuteqartunik piukkunnartunik oqaloqatiginninnissamut ingerlaavartumik aggersaasassaagut.

Atorfiup imarisaa pillugu allanik apeqqutissaqaruit, Generalsekretær Puk Draiby pd@fgb.dk-imut saaffiginninnissamut tikilluaqqusaavutit.