Nammineq kajumissutsimik sulineq isumaqarluarpoq – aamma ukiut qulissaanni
Naja Københavnimi meeqqat atuarfianni meeqqanut atuakkanik atorniartitsisartuuvoq, saniatigullu Kalaallit Meerartaanni nammineq kajumissutsimigut sulisuuvoq, ilaatigut Nuan Københavnimi meeqqat sapaatip-akunnerata naanerani angalaaqatigisarlugit.
”Ukiut qulerpiaat matuma siorna nammineq kajumissutsikkut sulisutut aallartippunga, taamani peqatigiiffiup anaanat katerisimaartarfissaat Københavnimi aallarnisartussanngormagu. Ulloq manna tikillugu suli peqataaninnut pissutaavoq, suliap uannut isumaqarluartuunera. Meeqqat ataatsimooqatigiiffiannut sinaakkutissanik pilersitseqataasinnaanermi nuannaalersittarpaanga,” Naja oqaluttuartpoq.
Pinngortitami qanitariinneq
Ullumi Najap meeqqat ’Nuan’-imiittartut peqatigikulanerusarpai ualikkut nuannisaqatigiinniarlutik unnukkullu nereqatigiinniarlutik naapikkaagata, imaluunniit Hareskoven-imi illuaqqamut sapaatip-akunnerata naanerani unnuiartoraangata – pinnguaqatigiillutillu nuannisaqatigiinniarlutik.
”Sapaatip-akunnerata naanerani angalasarnerit nuannequtigaat ataatsimooqatigiinnissamut piffissaqarluartarnerput. Telefonigut qameriarlugit toqqoriarlugillu ataatsimoorluta pinngortitami pisuttuaqatigiittarnerput allatut ittumik imminut qanilleriarnissamut periarfissaqalersitsisarpoq,” Naja oqaluttuarpoq nangillunilu:
”Siorna aamma nuannerluinnartumik misigisaqarpugut, meeqqat ’Nuan Esbjerg’-imiittartut ilagalugit Fanøliaratta. Sulisut namminnerlu kajumissutsimikkut peqataasut allat peqatigalugit aaqqissuussinerup iluatsilluarnissaanik suleqatigiinnerput misigisaavoq nuannersoq, aamma nuannerluinnarpoq ulloq naavillugu sissami ujaqqanik qalerussanillu katersisinnaanerput.”