Sisi – tassaavoq meeqqanut angerlarsimaffimmik avataanut inissitanut ataatsimooqatigiittarfik
Meeqqat piumasaat tunngavigalugit
Isumaginninnermut Nunamullu Namminermut Ministeeriaqarfimmit kisitsisit naapertorlugit 2019-ip naanerani meeqqat inuusuttullu Kalaallit Nunaanni inunngornikut maanna Danmarkimiittut 7 %-ii angerlarsimaffimmik avataanut inissinneqarsimaapput. Sanilliussissagaanni meeqqat Danmarkimiittut allat 1 %-ii angerlarsimaffimmik avataanut inissitaapput.
Meeqqat kalaallit Danmarkimi ilaqutariinnut paarsisartunut imaluunniit paaqqinniffinnut inissinneqaraangamik, arlalitsigut kulturikkut kingoqqiffimminnut attaveqarneq annaasarpaat, taamaammallu meeqqat kisimiittorujussuartut misigisinnaasarput. Meeqqat taakku ilarpassuinut allaasutut ”kukkusuusutullu” misigineq initusaqaaq.
Suliniut ’Sisi’ aqqutigalugu meeqqat kalaallit angerlarsimaffimmik avataanut inissitat, namminneq piumasaqaatitik tunngavigalugit ataatsimoornissaminnik neqeroorfigineqartarput. Meeqqat meeraqatiminnik nammineq aqqusaakkamik assiginik aqqusaagaqarsimasunik ikinngutitaartortarput, inersimasunullu aalaakkaasunut, kalaallit kulturiannik ilisimasaqarlutillu angerlarsimaffiup avataanut inissitaanermik misigisaqarsimasunut attaveqarsinnaallutik. Sapaatip-akunnerisa naanerini ataatsimoornerni aasaaneranilu tammaarsimaaqatigiinnerni, meeqqat nuannisaqatigiinnissamut periarfissaqartarput, ilutigisaanillu angerlarsimaffimmik avataanut inissinneqarnikkut annaasaqartutut misiginerit isummersorfigalugit suliarisinnaallugit.
’Sisi’ meeqqanut tamanut angerlarsimaffimmik avataanut inissitanut Jyllandip avannaani qeqqanilu kommunini tamani najugalinnut ammasumik neqeroorutaavoq, Trygfondenimit Aalborgillu Kommunianit tapiiffigineqartoq.
Annertunerusumik paasisaqarusuppit?
Suliniummi pisortaq Jeppe Bülow Sørensen emaili una atorlugu: jbs@fgb.dk imaluunniit suleqataasoq Torben Toft Nielsen emaili una aqqutigalugu: ttn@fgb.dk attavigisinnaavatit.
”Sisi-mi attaveqatigiinnerit kinguneraat, meeqqat ajornartorsiutiminnik paasinnittunik qaqugukkulluunniit oqaloqateqarsinnaanerat.”
— Aqqaluk 20-nik ukiulik, Sisi-mi nammineq kajumissutsiminik sulisoq, namminerlu angerlarsimaffimmi avataanut inissitaanikuusimasoq.
Meeqqat ’Sisi’-mut peqataasartut ilarpassuisa Kalaallit Nunaat annikitsuinnarmik eqqaamasaqarfigaat, ataasiakkaat Kalaallit Nunaanniinngisaannarnikuupput, ikittuinnaallu kalaallisut oqaluttarput. 2018-imi meeqqat ’Sisi’-miittartut Kalaallit Nunaata takunissaanut takoqqinnissaanulluunniit periarfissinneqarput, Qasigiannguanukaramik. ”Sisi-mi anguniagaavoq, meeqqat piginnaanngorsarnissaat aamma Kalaallit Nunaanni Danmarkimilu inuiaqatigiinni peqataanissaannut pitsaanerusunik periarfissinnissaat. Ataatsimoorlutik kalaallisut kulturikkut tunuliaqutaat, kinaassusaannut imminnullu paasinerannut pingaaruteqartumik ilaavoq, tamannalumi tapersersorlugulu inerisassavarput,” taama oqarpoq Torben Toft Nielsen, Sisi-mi perorsaanikkut suleqataasoq.