Meeqqat arsartalerneri tamaasa nalliussisarpagut
Meeqqat sunngiffimmi sammisamik sunngiffimminniluunniit suliffik aallartitsineri tamaasa suliatsinnik iluatsitsiffigisatsitut misigisarpagut. Tamannami tassaavoq meeqqanik inuusuttunillu tigussaasumik aallarnisaalluarneq. Taama oqarpoq Elna Koch, Kalaallit Meerartaanni meeqqanik ilaqutariinnillu ilitsersuisartutut Vejlemi sulisoq.
Eqqumiiginarsinnaavoq meeqqap ataatsip arsartalernerata persuarsiutigineqarnera, kisianni misissuinerit takutippaat meeqqat inuusuttullu sunngiffimmi sammisartakkamik sunngiffimmiluunniit suliffimmik aallussilluartut meeqqanit inuusuttunillu taama periarfissaqanngitsunit ingerlalluarnerusaqisut. Elna Koch Kalaallit Meerartaanni Vejle-mi meeqqanik ilaqutariinnillu ilitsersuisartuuvoq. Arlaannik ornittagaqarneq meeqqanut ilaqutariinnullu ataasiakkaanut annertoqisumik pingaaruteqarsinnaavoq, taamali pisoqarnissaata tungaanut aporfissat amerlasinnaasaqaat. Elna nangippoq:
Aporfissat amerlaqaat
”Ilaqutariit sullissagut arlallit annikitsuinnarmik attaveqarfigisartagaqarput, inuiaqatigiinnilu najukkaminni periarfissat ilisimanagit. Saniatigut ataqatigiissaaralunilu meeqqap sammisassaanut qaniornissaa nukissaqarfigisariaqarpoq. Ilaqutariit ilaannaasa meeqqap sapaatip-akunneri tamaasa sammisassaminukartinnissaa sapertanngilaat, aningaasartuutillu sammisaqartitsinermut tunngasut akissaqartittarmagit. Taamaammat aamma kattuffiit allat ilaqutariinnik akissaalatsisisunik ikiuisartut suleqatigisarpagut, taakualu ilagaat BROEN, meeqqat inuusuttullu sunngiffimminni sammisaqarnerminni atortussarsinissaannik ilaasortaanermullu akiliutinik akiliinissaannik ikiorsiisartut.”
Aammattaaq Esbjergimi Kalaallit Meerartaanni meeqqanik ilaqutariinnillu ilitsersuisartut NGO-nik kattuffinnillu allanik meeqqat inuusuttullu sunngiffimmi sammisartakkanut peqataanissaannik ikiuuttartunik qanimut suleqateqarput. Meeqqanik ilaqutariinnillu ilitsersuisartup Charlotte Pallesenip meeqqat inuusuttullu sunngiffimminni sammisaqartarnissaannik tapersiinissamut peqqutitsialaat arlallit tikkuarpai.
Toqqissisimanartitaq qimalaarlugu
”Kalaallit meeqqat inuusuttullu uagutsinni ataatsimooqatigiittarfii pingaaruteqaqaat; imminnut sanilliussinnaasarput oqaatsitillu kulturertillu isiginialersarlugu. Toqqissisimanermik ataavassutsinillu annertuumik pilersitsisarpoq, tamannalu pingaartuuvoq – kisianni aamma uagut suliassarivarput meeqqat inuusuttullu toqqissinartitaminnit qimatsilaarlutik sammisaqarfinnut ataatsimooqatigiiffinnullu allanut akuutilernissaat. Tamatumanilu sunngiffimmi sammisartakkat namminiilaarnissamut iluaqutaasarput, sammisatillu aqqutigalugit pikkoriffimmik ilaat paasisinnaalersarlugit.”
Sinniisoq 15-inik ukiulik Esbjergimi najugaqarpoq, ataasinngornerillu tamaasa sulorartarluni.
“Tamatigut takkuttuaannarpunga, taamaammallu takkunnissara ilimagisarpaat. Ukiuni pingasuni peqataasarninni sungiusaasora taannaajuarnikuuvoq taassumalu meerai aamma peqataasarput. Takuneri tamaasa nuannaartarput aperisarpaanngalu qanoq-innersunga. Nuanneqaaq”.
Charlotte-p aamma imminut pisussaaffilernerup pingaarutaa tikkuarpaa. ”Isumaqarpunga pingaartuusoq atorluarsinnaasorlu meeqqat ilinniartikkaanni ima eqqarsarsinnaalersillugit: ”Imaassinnaavoq ullumi qasoqqalaartunga, kisianni peqataajartortariaqarpunga, imminut pisussaaffilernikuugama, aamma inuit allat takkunnissara naatsorsuutigimmassuk.”
Kalaallit Meerartaanni meeqqanut ilaqutariinnullu suliniut
’Nuan’ tassaavoq meeqqanut ilaqutariinnullu suliniuterput, ilaqutariinnik, meeqqanik inuusuttunillu ataatsiakkaanik tamakkiisumik sullissiviusoq, ’anersaartulaarnissamik ’ neqerooruteqarfiusoq, maanilu kalaaliuneq nakuussutitut isigineqartarpoq aamma kalaallit oqaasii kulturiallu qitiutillugit ataatsimooqatigiittoqartarluni.
Inuit ataasiakkaat tapersersornerisa, illersornerisa ilaqutariillu pulaartarnerisa saniatigut ’Nuan’ aamma sapaatip-akunnerata naanerini angalaaqatigiinnissanik, meeqqat inuusuttullu ataatsimooqatigiittarfiinik, ilaqutariinnut aaqqissuussinernik nereqatigiittarnernillu neqerooruteqartarpoq, tamatumanilu ataatsimooqatigiiffiit patajaatsut ataatsimoorluni nuannersunik misigisaqarnissamik pingaartitsiffiusut pilersikkiartuaarneqartarput.
’Nuan’ Aalborgimi, Aarhusimi, Esbjergimi, Vejle-mi aamma Københavnimi neqeroorutaavoq.