Suliartoraangama uattulli anguniagallit naapittarpakka
Trine Lykkegaard suliniummi ’Nuan’-imi meeqqanik ilaqutariinnillu ilitsersuisartutut atorfeqarpoq, atorfialu Aarhusimi Vejle-milu suliffiuvoq. Suliassaanut ilaapput meeqqanut klubbit, nereqatigiissitsinerit, sapaatip-akunnerata naanerani angalanerit aamma ilaqutariinnik ilitsersuinerit kiisalu inuusuttunik namminnerlu kajumissutsimikkut sulisunik sammisaqartitsinerit.
Uannut annertuumik pinngaaruteqarpoq ullut tamaasa suliartortarnissara, suleqatinik suliaminnut tunniusimasunik uattut anguniagaqartunik avatangiiseqarlunga. Kalaallit Meerartaanni misigisimavunga inunnut amerlasuunut annertunngikkaluanik aammali annertuunik allannguinissamut inissaqartitsisoqartoq, nukissaqartoqartoq periarfissaqartorlu.
Sooq Kalaallit Meerartaanni atorfik qinnutigiviuk?
Ukiorpassuarni ilinniartitsisutut sulininni isumaginninnikkut perorsaanermut tunngasut immikkut soqutigilernikuuakka, aamma kulturikkut tunuliaqutatta assigiinngitsut inuttut akornatsinni ilinniarfiginissaat soqutigiuarnikuuara. Taamaattoq sulininni kaammattuutaanerpaasarpoq meeqqanut inuusuttunullu allanngueqataarusunneq. Peroriartornerisa takusinnaanerat – annikitsutigut annertunerusutigullu aamma piffissami sivikinnerusumi sivisunerusumilu. Kalaallit Meerartaanni uannut suliassatut pingaarutilittut isigivara meeqqanut inuusuttunullu ataatsimooqatigiiffinnik toqqissitseqataanissaq, namminiuffigisinnaasaannik, pingaaruteqarluartutut misigiffigisinnaasaannik, namminnerlu kissaatigisaminnik ilisimaarinninnerulerfigisaannik.
Atorfinni nutaami suliassatut pingaarnerit suuppat?
Aarhusimi meeqqat tikillugit sullippakka, annermik ’Nuan’imi sapaatip-akunnerisa naanerini angalaaqataasartutut. Vejle-mi ilaqutariinnik ilitsersuisartutut, inuusuttunut ataqatigiissaarisutut namminnerlu kajumissutsimikkut sulisunik ataqatigiissaarisutut sulisarpunga. Uannut pingaartuuvoq meeqqat angajoqqaallu ilisarisimallualernissaat, taakkualu uanga ilisarisimallualissagaannga, toqqissisimallutik saaffigisinnaaniassammannga, taamaammat illoqarfinni tamani meeqqanut klubbit, nereqatigiinnerit ilaqutariinnullu aaqqissuussinerit allat periarfissaqarnikka tamaasa peqataaffigisarpakka.
Maanna Kalaallit Meerartaanni atorfigilikkanni, suliarisarsimasannit allanit suut misilittagaqarfigivigit imaluunniit suut atorfigalugilllu suliarisarnikuuigit?
Ilinniartitsisutut meeqqat assigiinngitsunik ukiullit, assigiinngitsunik tunuliaqutallit assigiinngisitaaqisunillu ajornartorsiutillit ingerlalluarnissaannik, ilikkariartornissaannik ineriartornissaannillu suliaqartarnikuuvunga. Ukiut ingerlanerini sapaatip-akunnerata naanerani angalasarnerpassuit, atuarfimmit paasisassarsiorluni tammaarsimaarnerit, angajoqqaanik unnussiuaaqatigiissitsinerit aamma meeqqanik inuusuttunillu sammisaqartitsinerit amerlaqisut pilersaarusiortarnikuuakka. Saniatigut Dansk Flygtningehjælpimi namminneq kajumissutsimikkut sulisunik ataqatigiissaarinermik suliaqarnikuuvunga, tassanilu namminneq kajumissutsimikkut sulisut qanimut attaveqarfigilernikuullugiit, inuillu inuunermik ilarujussuani sakkortuunik nalaataqartarnikut inuunerminnilu stressertuaannangajannikuusut qanimut attavigisarlugit.