Siammartumi takorniuuttut
2013-imi inuusuttunut suliniutip ”Siammartup” aallartinneraniit holdit arfineq-marluk ingerlatsipput. Kalaallit Meerartaannit septemberimi sapaatip-akunnerisa naanerisa ilaanni holdit tamarmik katersuutsinneqarput. Katerisimaarneq naapeqatigeeqqinneruvoq Siammartullu – Kalaallit Meerartaasa inuusuttunut suliniutaata - ukiunik qulinngortorsiorneranik malunnartitsinerulluni.
Peqataasut ilarpassui imminnut takummaapput, aammattaarli katerisimaarnerminni inuusuttut ukioqatigiiaat akimorlugit nutaanik ilisarisimasaqalerput. Inuusuttut katillugit 31-t peqataapput; ilaat naapeqqaarnerminniilli imminnut attavigiittuartarsimapput, allalli qangali ilaminnik naapeqateqarsimallutik, tassami Siammartumi ingerlatsinerup kingorna peqataasut sumut tamaanga siammakaanikuupput.
”Taamaammat inuusuttut naapeqatigeeqqinissaannut periarfissiineq nuanneqaaq – allanik namminermisut aqqusaagaqarsimasunik naapeqateqarnissaannut periarfissillugit”, taama oqaluttuarpoq Kalaallit Meerartaanni meeqqat pillugit siunnersorti Helle Skriver, nangillunilu:
”Siammartoq inuusuttunut ikaarsaariarfimmiittunut tulluussagaavoq. Arlallit inersimasutut inuunermut ikaarsaarialerput, inuunerminnilu toqqammavissaminnik pilersitsisussanngorlutik. Siammartumut peqataanermikkut inuusuttut tigussaasunik sakkussinneqarlutillu pisinnaasaqalersarput, aammattaarli ataatsimooqatigiiffiit namminneq akunnerminni pilersitaat inuusuttut inuunerannut pingaaruteqartorujussuusinnaapput. Ataatsimooqatigiiffiit taamaattut patajaallisarusuppagut, ilaatigut ullumi pisutut inuusuttut katersuutsinnerisigut”.
Michaelimut Nuunumullu Siammartoq inuunerannik allannguisuuvoq; tassanimi 2015-imi imminnut naapeqqaarput. Ullumikkut marlunnik meeraqarput.
Suliniutip ”Siammartup” 2013-imi aallarteqqaarneraniit holdit arfineq-marluk ingerlatsereersimalerput.
Siammartoq pillugu annertunerusumik allaaserissaqarpoq uani