Ataasinngornerit tamaasa nalunneq pomfritsillu
Pomfritsit nalunnermik ilinniarnertulli pingaaruteqartigingajapput. Tamanna tassaavoq Jeanetip Stephanillu ataasinngornikkut ileqqulersuutigisartagaat. Ataasinngornerit tamaasa Jeanetip Stephan 9-nik ukiulik aqqusaartarpaa nalukkiaqatiginiarlugu. “Marluulluta akunnialunni nuannisaqatigiittarpugut”, taama oqaluttuarpoq Jeanet, Kalaallit Meerartaanni nammineq kajumissutsimigut sulisuusoq.
Facebookikkut allatap Jeanet alapernaalersippaa. ”Piffissarisama ilaa nammineq kajumissusera naapertorlugu sulinissamut atorusuppara – nalunagulu sulinera meeqqanut tunngasuusariaqartoq. Kisianni nalaatsornerinnaavoq meeqqat kalaaliunerat. Isumaqarpunga kalaallit meeqqat arajutsineqaqqajaasartut, kisianni suliaq uannut isumaqarluartuussanersoq misilikkusulerpara”.
Aalisakkanik frikadelle-lianiit nalunnermik ilinniartitsinermut
Jeanetip Facebookikkut allatamut qisuariarneraniit ukiut arfineq-marluk qaangiussimalerput. Ukiuni sisamani Kalaallit Meerartaasa café-tut aaqqissuussilluni ilaqutariinnut suliniutaani nerisassiortuusarpoq, kisianni café-tut aaqqissuussisarnerit ilusaat allanngorpoq, nerisassiortutullu suliaq annertuallaalerluni. ”Kisianni aalisakkanik frikadelle-liakka mamarineqartaqaat, taamaammat ilaanneeriarlunga suli siatsivissuit atorlugit nerisassiortarpunga, tassami aalisakkanik firkadelle-liat amerlasaqaat”, Jeanet oqaluttuarpoq.
Ullumikkut Jeanetip Stephanip samminissaa aallunneruaa. Stephanip nalunnguartarfimmiinneq nuannareqaa nalloreqalunilu, taamaammat januaarimiilli ataasinngornerit tamaasa Jeanetip Stephan naluttarfiliaqatigisalernikuuaa. Stephan nalunnguariartarsinaasimassanngikkaluarpoq Jeanetip ikiortanngitsuuppani, siusinaartumillu pensionisialittut Jeanetip aamma iluaqutigisarpaa, ulluinnarni inuunerminik ilusiliisinnaasarnini. ”Taamaalilluni isumaqatigiissuterput naapertuuttuuvoq, tamatsinnut iluaqutaasoq”, Jeanet oqaluttuarpoq.
Naloreernerup kingorna sutorniartarfimmi pomfritseqartarpoq, - “Ileqqulersuutitta ilagaat”, Jeanet oqaluttuarpoq.
Pomfritsit pinngitsoorneqarsinnaanngillat
Naloreernermi aalajangersimalluinnartumik naluttarfiup sutorniartarfia aqqusaartarparput, Jeanet oqaluttuarpoq. ”Stephan isumaqarpoq tassani pomfritsit mamarluinnartuusut, tamannalu ataasinngornikkut ileqqulersuutitta ilagilernikuuaat, marluulluta nuannareqisarput”, Jeanet oqaluttuartpoq, aamma ilaanneeriarluni Stephan qatanngutaalu immikkut ittunik sammisaqartittarpai. ”Aasaanerani atuanngiffiup nalaani ilaatigut Djurs Sommerlandimiippugut aamma Cirkus Summarumimiinnikuuvugut. Isumaqarpunga meeqqanut tamanut pingaartuusoq atuanngiffiup nalaani misigisimasanik atualeqqinnermi atuaqatinut oqaluttuassaqarnissaq. Uannullu pingaartuuvoq allanut naleqartunik piffissarisama atornissaa”.