TASSA! Iluaqutaasussanut ilaavoq
Nakuuserneq paquminartuuvoq inuiaqatigiinnilu kingunerluutaasoq oqaluuserineq ajugarput apeqquteqarfiginerlu ajugarput. Taama allaqqavoq Naalakkersuisut nakuusertarneq akiorniarlugu iliuusissatut pilersaarutaata saqqummersinneqaqqammersup siulequtaani. Naalakkersuisut naapertorlugit Kalaallit Meerartaasa nakuusertarneq akiorniarlugu suliniutaa ”TASSA!” kinguaariit tulliuttut nakuusernertaqanngitsumik avatangiiseqarnissaasa pilersinnissaannut aqqutissaasut ilagaat.
Kalaallit Meerartaanni Nuummi allattoqarfimmi pisortap Julie Lynge-p iliuusissatut pilersaarusiaq soqutiginartillugu atuarpaa. ”Assut tulluusimaarutigivara ”TASSA!” nakuusertarneq akiorniarlugu pisortatigoortumik iliuusissatut pilersaarusiamut ilanngunneqarsimammat. Tamanna tassaavoq suliniutip pingaarutaasalu akuersaarneqarnerat”, Julie Lynge oqarpoq.
Nakuuserneq tamanit akisussaaffigineqarpoq
Julie Lynge-p aammattaaq maluginiarpaa, inuiaqatigiinni nakuusertarnerup killilernissaanut pitsaaliornissaanullu naleqqiullugu, Naalakkersuisut iliuusissatut pilersaarusiaminni ilinniartitsinissamik pitsaaliuinissamillu pingaartitsinermik saniatigut, nakuusertarnerup inummut namminermut taamaallaat tunngasuunnginneranik Naalakkersuisut oqariartuuteqarnerat.
”Tamanna isumaqatigilluinnarpara, isumaqarpungalu taamatut nalunaarneq oqariartuummik pingaarutilimmik imaqartoq. Nakuusertarneq inuiaqatigiinni misigisartagarput, ataatsimoorluta akisussaaqataaffigilluinnarparput, pingaaruteqarluinnarporlu nakuusertarnerup isummersorfiginissaata sapiissuseqarfiginissaa, nakuusertarnerullu akuerinngilluinnarnissaa. Tamannalumi ”TASSA!”-mi pineqarpoq, nakuusertarneq isertukkatut kanngunartutullu inissisimajunnaartipparput, inuusuttut nakuusertarneq pillugu ilisimasaqalersillugit, nakuusertarnermik eqqartuisinnaanngortillugit aamma misigissutsit artornartut – kamannerup, aliasunnerup puullaaqqinerullu - pissuseqarfiginissaannut tigussaasunik sakkussillugit. Upperivara tamatuma pissutsit illua-tungaanut saatissinnaagai, kinguaariit tulliuttut tarnikkut timikkullu nakuusertarnermik aserorterisaqisumik ullumikkullu inuiaqatigiinnik tamanik sunniisumik, misigisartagaat annikinnerulersillugit”, Julie Lynge naggasiivoq.
TASSA! Pillugu annertunerusumik atuagassaqarpoq uani
Nakuusertarneq akiorniarlugu iliuusissatut pilersaarut atuaruk uani