Atatsimoorluta allannguivugut
Aasaru Narsaq uummaarissaqaaq sammisaqarfiulluarlunilu, namminneq kajumissutsimikkut sulisut nunanit tamalaaneersut Narsarmiunik nukissaqarluartunik suleqateqarlutik aasarsiortitsilerpata. Aasarsiortitsineq naammassippat piffissami sivisuumi suliniutaasussaq ’Ikioqatigiinneq’ aallartissaaq. Narsami kultureqarnermut sunngiffimmilu sammisassaqartitsinermut pisortap Ivalo Motzfeldt-ip suleqatigiinnissaq qilanaarivaa. Qularinngilluinnarpaami allannguinerit ataatsimooqatigiinnikkut pilersinneqartartut.
Ivalo Motzfeldt 1995-imiilli ilinniartitsisuuvoq. Ukiut 25-t meeqqat atuarfianni sulereerluni, ilaatigut atuarfimmi pisortatut, allamut saakkallarnissani toqqarpaa, Qaqortumilu kollegieinspektøritut sulilerluni. Kisianni nunani Narsaq nuannareqigamiuk uteqqinnissani aalajangiuppaa, tassanilu ukiuni tallimani kingullerni Kommune Kujalliup ataani kultureqarnermut sunngiffimmilu sammisassaqartitsinermut pisortatut sulilluni.
“Narsaq illoqarfiuvoq nuannersoq ilakkuminarluinnartunik imminnullu piffissaqarfigisunik inulik, Ivalo Motzfeldt illoqarfik angerlarsimaffigisani pillugu oqarpoq.
“Kisianni aamma illoqarfiuvoq ataatsimooqatigiiffinnik pisariaqartitsiffiusoq, ataatsimoorlunilu pilersitsinissamik kajumissuseqarfiusoq.”
Ivalo Motzfeldt suleqatigiinnut ’Narsap uummateeraanik’ imminnut taagortunut ilaavoq. Taakku inunnik assigiinngitsunik sammisaqartitsisarput, soorlu puisip neqaanik siaasaaneq, kinguaariit arlallit nereqatigiittarlutik.
“Uannut suleqatigiinnissaq pingaartuuvoq. Kivitseqatigiinnikkummi inuiaqatigiinnut tamanut pingaarutilinnik pilersitsisoqarsinnaavoq,” Ivalo nassuiaavoq.
Kingulliarsuit qangaaniit pisinnaasanik ilinniassapput
Aasamut aasarsiortitsineq aamma Ikioqatigiinneq — tassa suliniut sivisuumik ingerlasussaq illoqarfimmilu sammisassanik ineriartortitsisussaq tapersersuisussarlu — aqqutigalugit Ivalo Motzfeldtip ataatsimoorfiit ineriartortitsisut suli amerlanerulernissaat qilanaarivaa.
”Takorloorpara Narsaq meeqqat inuusuttullu qangaaniilli pisinnaasanik ilinniarfigisaat: aalisarneq, aalisakkanik panertulineq, pinngortitameersunik suliaqarneq aamma immami angalanissamik toqqissisimanartitsineq. Kissaatigaakka imigassartaqanngitsumik ilaqutariinnik sammisaqartitsinerit amerlanerit, nipilersornermik kulturimullu tunngasunik misigisaqartarnissaq aamma ataatsimooqatigiiffiit patajaatsut, attaveqatigiinnerit ineriartorfigisinnaasaat,” Ivalo oqarpoq.
’Ikioqatigiinnermi’ sumiiffimmi najugaqartut peqatigalugit sammisaqartitsinerit ataatsimooqatigiiffiillu illoqarfimmi meeqqat ilaqutariillu inuunerissuunissaannut ikorfartuutaasut ineriartornissaat tapersersornissaallu qitiutittarparput. ’Ikioqatigiinneq’ maannakkuugallartoq Nanortalimmi, Qeqertarsuarmi Kullorsuarmilu ingerlanneqarpoq. Taamaalilluni Narsaq suliniuteqarfiusut sisamaattut inissisimalissaaq.
’Ikioqatigiinneq’ Nordea-fonden-imit tapiiffigisaavoq