Nuummi allattoqarfik alliartorpoq
Nuummi allattoqarfimmi oqarasuaatit sianikulanerulerput, sulisut ataatsimiinneri uummaarinnerulerput kaffiliuullu atorluarneqarnerulerpoq. Kingullertut Esther Arens aamma Bolette Gram-Hermund suliniutinut inerisaanermullu siunnersortitut atorfinitsinneqarput.
Ulapaartoqartuarpoq, Nuummilu allaffimmi amerlanerulernikuuvugut. Tamanna Nuummi allattoqarfimmi pisortap Julie Lynge-p nuannaarutigaa. ”Tassami maluginiarpara suliniutigut annertusiartortut inuiaqatigiinnullu iluaqutaallutik. Allattoqarfiup 2021-mi aallartinneraniit suliatta Kalaallit Nunaannit aallaaveqarnissaat sulissutigivarput, tamatumalu ilutigisaanik pissusissamisuuginnarpoq Nuummi nukissatigut sillimmatitta sulisorisattalu amerlinissaat”.
”Nuummi allaffimmi sulisut amerlinerisa saniatigut, meeqqanik inuusuttunillu sullissivinnik allanik, aammali kommuninik inuussutissarsiutinillu ingerlatsisunik suleqatiginninnerit pitsaasut pilersinnikuuagut”, Julie oqaluttuarpoq nangillunilu: ”Upperivarput suleqatigiinnikkut angusaqarnerpaassalluta. Kingullertut ’SOS Børnebyerne’ suliniut ’Ikioqatigiinneq’suleqatigilerparput, sumiiffinni ataasiakkaani suliniutinik sammisaqartitsinernillu ikorfartuinissamik siunertaqartoq, aallaqqaammullu Nanortalimmi Kullorsuarmilu ingerlanneqartoq”.
’Ikioqatigiinneq’ pillugu annertunerusumik atuagassaqarpoq uani