Kalaallit Nunaat pillugu ilisimasakinnerup pisortani sulianik suliaqarnerliorneq kingunerisarpaa
Tamanna tassaavoq Bornholmimi Folkemødimi oqallitsitsinitsinni aallarniutaasumik tunngavissaqartumik saqqummiussat ilaat, oqallitsitsinitsinnut qulequtaavoq Sulianik suliaqarneq qalipaatinik immikkoortitsinngitsoq – kommunimi ikkinnerussuteqartut meeraat.
Oqallinnermi peqataapput:
- Rune Nielsen, Rigshospitalimeersoq, tarnip pissusiinik misiliinerni kulturikkut kukkusartakkanut aallaaviusumik ilisimatusartoq
- Henriette Berthelsen, INUA-meersoq, peqqissaasoq ilaqutariinnillu katsorsaasartoq
- Rasmus Brygger, Inuit pisinnaatitaaffiinut Institutimi immikkut inuiaassuseq pillugu suleqatigiinni pisortaq
- Aaja Chemnitz, IA-miit Folketingimut ilaasortaq
- Jeppe Bülow Sørensen, Kalaallit Meerartaasa Danmarkimi suliniutaannut pisortaq
Aqutsisoq: Anne Kirstine Hermann, tusagassiortoq aamma antropolog, atuakkiaraa: Imperiets Børn.
Oqallinnermit issuakkat marlussuit uani atuarsinnaavatit, oqallinnerlu tamarmiusoq takusinnaallugu uani: https://vimeo.com/user100416093/farveblind?share=copy
”Kulturikkut assigiinngittoqaannanngilaq – annertuumik kulturikkut assigiinngittoqarpoq (..) Tassaavugut Danmarkimi nunap inoqaatuai, eqquutsinneqanngitsunik pisinnaatitaaffillit”.
Henriette Bertelsen
”Danmarkimi oqartussat inuit assiigiimmik pineqarnissaat kissaatigisarpaat, kisianni inuit assigiinngitsumik pinngikkaanni assigiimmik pineqarsinnaanngillat, uagullu inuit kulturinit allaneersut pissusilersoriaasiisa paasinissaat pikkoriffigivallaanngilarput”.
Rasmus Brygger
”Ilisimasat amigaataapput, tamannalu ajornartorsiutaavoq annertooq. Uanga nammineq Ilulissani meeraallunga misiginikuuara, qallunaatut erinarsortarlutalu Danmarki pillugu ilinniartitaalluta, kisianni uanga meeqqakka Danmarkimi atuarfimminni Kalaallit Nunaat pillugu ilinniagaqarnikuunngillat. Kalaallit Meerartaanni sulianik suliaqartut naapittakkatta ilarpassuisa Kalaallit Nunaat pillugu tunngaviusumik ilisimasassariaqaraluakkat naluaat”.
Jeppe Bülow Sørensen
”Angajoqqaajuneq pillugu immikkut ilisimasallit, kulturit akimorlugit suliaqartut, piginnaanngorsarnissaat pisariaqarpoq, ilaatigut nammineq kulturerisaq paaseqqaagassallu pillugit. Qanittukkut psykologit tamakkunannga suliaqartut ilinniartippakka, taakkualu ajornartorsiutaasartut pillugit tusagaqarnikuunngisaannarput”.
Rune Nielsen
”Isumaqarpunga ilaqutariinnik kalaallinik assigiinngisitsisoqartartoq, kalaallit kulturiannik naammattumik ilisimasaqannginneq pissutigalugu, taamaammat pingaartuuvoq sulianik suliaqartut ikorfartorneqarnissaat Kalaallit Nunaallu pillugu ilisimasaqalersinnissaat”.
Aaja Chemnitz
Sulianik suliaqartarneq patajaallisarniarlugu suliniut aallartinneqassaaq
Kalaallit Meerartaanni suliniuteqarnissaq piareersarparput, kommunini sulianik suliaqartarnerup pitsanngorsarnissaanik siunertaqartumik. Suliniut marloqiusaasumik sammiveqassaaq – siullertut suliamik ilisimasallit kalaallit imaluunniit Kalaallit Nunaannik ilisimasallit siunnersuisartoqatigiit meeqqanik angerlarsimaffiup avataani inissiinernut atatillugu sulianik suliaqartunik siunnersuisinnaasut, aamma kommunini sulisut – angerlarsimaffiup avataanut inissiinerni sulianut naleqqiullugu aammali ilaqutariit kalaallit atugarliortut akornanni pitsaaliuilluni sulineq patajaallisarniarlugu - piginnaanngorsarniarlugit paasititsiniaanissaq.
Suliniut pillugu annertunerusumik paasisaqarusukkuit suliniummi pisortaq Jeppe Bülow Sørensen attavigisinnaavat uunga mailerlutit: jbs@fgb.dk imaluunniit 5164 7003-mut sianerlutit.