Folkemødimi takuss…
Kalaallit Meerartaat Folkemødimiissaaq, tassanilu peqataaffigissallugu oqallissaarut Farveblind sagsbehandling - minoritetsbarn i kommunen (Suliamik suliarinninneq qalipaatinik takunnissinnaanngitsoq – kommunimi inuit ikinnerussuteqartut meeraat). Tassani sammineqassapput unamminartut takkuitsuuinerillu inuiaqatigiinni ikinnerussuteqartut meerartaasa pisortanit pitsaasumik suliarineqarnissaannut akornutaasinnaasartut – minnerunngitsumik suliat ilaqutariinnut kalaallinut tunngasuugaangata.
Ukioq manna Bornholmimi Folkemødimut piareersarnerit ingerlanneqaleruttorput – aamma Kalaallit Meerartaanniit tamat oqartussaaqataanerat tunngavigalugu katerisimaarnermi 15. – 17. juni ingerlanneqartussami peqataanissatsinnut qilanaarpugut. Kattuffiit arlallit allat Børnesagens Fællesrådimeersut peqatigalugit ataatsimoorussamik pilersaaruteqarpugut qulequttallu assigiinngitsut immikkut sammissallutigut, soorlu meeqqat piitsutut inuusut, meeqqat inuusuttullu akornanni kiserliortarneq aamma meeqqat angerlarsimaffimmik avataanut inissitat attaveqaataannik patajaallisaaneq.
Oqallitsitsineq ”Farveblind sagsbehandling - minoritetsbarn i kommunen (Suliamik suliarinninneq qalipaatinik takunnissinnaanngitsoq – kommunimi inuit ikinnerussuteqartut meeraat)” tunngavigalugu kissaatigivarput, inuit ikinnerussuteqartut meerartaasa pisortanit suliassatut suliarineranni unamminartut takkuitsoortakkallu suut suliap pitsaasumik suliarinissaanut akornutaasarnersut pillugit oqallittoqarnissaa – minnerungitsumik ilaqutariit kalaallit pisortanit sullinneqarneranni eqqarsaatigalugu. Assersuutigalugu suliamik suliaqartut aamma angajoqqaat kalaallit akornanni suleqatigiinnissamut qanoq iliorluta pitsaasunik sinaakkusiissaagut. Upperivarput suleqatigiilluarnikkut aaqqiissutissat meeqqanut pitsaanerpaat qularnaarneqarsinnaasut.
Ukiuni kingulliunerusuni ersarissinikuuvoq meeqqat kalaallit Danmarkimiittut angerlarsimaffimmik avataanut pinngitsaaliissummik inissinneqartartut meeqqanut angerlarsimaffimmik avataanut inissitaasartunut allanut naleqqiullugit amerlanerujussuussut — angerlarsimaffiullu avataanut inissiinerit taakkua ilaannut kulturikkut oqaatsitigullu paatsortarnerit pissutaasinnaasut. Taamaammat pingaaruteqarluinnarpoq ilaqutariit kalaallit Danmarkimiittut inatsisit malillugit isumannaatsumik pineqarnissaasa qularnaarnissaat. Atuakkamik Imperiets børn-imik atuakkiortup, tusagassiortup Anne Kirstine Hermann-ip, paatsoornernut ilungersunartunut tunngaviusartut, meeqqallu tassanngaannartumik angerlarsimaffimmik avataanut inissittariaqartut sumiginnarnagit qanoq qaangerneqarsinnaanerinik oqallinneq erseqqissateqarfigivaa.
Ajornartorsiut nutaajunngilaq, ilaqutariit kalaallit Danmarkimiittut pisortanit suliassatut suliarinerini ajornartorsiutit piffissami sivisuumi samminikuuagut. Qujanartumik ukiup kingulliup ingerlanerani ilaqutariit kalaallit inatsisitigut illersugaanerisa patajaallisarnissaat politikkikkut eqeersimaarfigineqarpoq. Ilaatigut danskit naalakkersuisuisa 7,8 mio. kr. aningaasaliissutiginikuaat, ilaqutariit kalaallit meerartaat pillugit sulianik suliaqartarnermi suleqatigiinnerup patajaallisarnissaanut atugassatut. Taakkunannga 4,4 mio. kr. immikkoortinneqarput siunersuisartoqatigiinnut Kalaallit Meerartaannit pilersinneqartussanut atugassatut.
Allattaaneq Puk Draiby naapertorlugu suliassaq pingaarutilik tullinnguuppoq:
”Meeqqat kalaallit pisortanit suliatut suliarineqarneranni aamma angerlarsimaffimmik avataanut inissinneqartarnerini pitsaassutsip annertusarnissaanik qularnaareqataassaagut. Sulianik suliaqartut ilaqutariinnik kalaallinik sullissisut atoriaannarnik sakkussinnissaat pisariaqartinneqarpoq, aamma pingaaruteqarluinnarpoq meeqqap kalaallip kingoqqivimminut attaveqartuarnissamik pisinnaatitaaffiata qularnaarneqarnissaa. Qularnanngilaq tamanna pillugu isiginneriaatsit takkuitsoortakallu amerlaqisut. Neriuppugut tamakku Folkemødimi pissanganartumik oqallinneq aqqutigalugu paasisaqarfiginerujumaarlugit, inuit suliamik ilisimasaqarluartut arlallit peqatigalugit.
Oqallinnissaq kikkullu peqataanissaat annertunerusumik allaaserineqarpoq uani