Aasaanerani katerisimaartitsinerit: Inooqatigiissutsikkut allannguinissamut alloriarfiit

Illoqarfimmi aasaraangat innuttaasut katersuuttarput meeqqat inuusuttullu nuannersunik misigisaqartinniarlugit. “Ersarippoq kajumissuseqarluarluni meeqqat inuusuttullu innuttaasullumi tamaasa allanngueqataaffigerusunneqartartut”, taama oqarpoq Nuummi allattoqarfimmi pisortaq Julie Lynge.

Peqataarusuttut ilagaat Ulrik Fjord Schultz. Ulrik Brugsenimi pisortatut suliffeqarfiit inooqatigiissutsikkut akisussaaqataanissaannut (CSR) tunngatillugu aqutseqatigiinnut ilaavoq, taakkulu najukkami inuiaqatigiinnut naleqartunik pilersitsinissaq qitiutippaat. Taamaammat Ulrik niuertarfimmi nioqqutissat akikillinissaannut pølsinillu siaasaasuunissaminut akuersisarpoq, taamaaliorlunilumi aasaq manna  Nanortalimmi aasarsiortitsinerup nalaani siaasaasoqalermat. ”Illoqarfitsinni meerartatsinnut inuusuttatsinnullu sammisassaqartitsinissanut peqataarusuttaqaanga. Sunngiffiga tamatumunnga atorusuttarpara, aammattaarli Brugsenimi sulinera tunngavigalugu assersuutigalugu kommunimik, atuarfimmik kattuffinnillu Kalaallit Meerartaasut ittunik suleqateqarnissara kissaatigalugu. Qularutiginngilara meeqqat iluaqutissarsitissinnaallutigit arlaliulluta ataatsmoorutta”.

Camp Nuan unnukkut siaasaatitsimmat Nanortalimmi innuttaasut tapersersuilluarput. Ulrik Fjord Schultz inunnut 140-nut takkuttunut pølsinik siaasaasuuvoq.

Ulriup oqaatigaa illoqarfimmi sulerusussuseqarluartunik inooqatigiissutsikkullu akisussaaffimmik tigusiumasunik inoqartoqarmat. Assersuutigalugu illoqarfimmi politeeq Emil, illoqarfimmi meeqqanik inuusuttunillu skakkernermik innartornermillu sammisaqartitsisartoq. Kisianni sulerusussuseqartut kisimiissinnaanngitsut Ulrik isumaqarpoq. ”Qasusoorsinnaapput imaluunniit illoqarfik qimallugu aallarsinnaallutik, taamalu pisoqarnerani suliniutaagaluit pitsaasut unittoorsinnaapput”, Ulrik oqarpoq.

Ulrik naapertorlugu illoqarfimmi amigaataapput sammisassaasinnaasut amerlanerit, aamma meeqqat inuusuttullu sammisinnaasaminnik ujartuipput. ”Aasarsiortitsisarnerit illoqarfimmi meeqqanut inuusuttunullu neqeroorutitsialaapput. Taama pisoqarnerani nutaanik pissanganartunillu pisoqartarpoq illoqarfimmiillu tapersersuineq annertuvoq, kisianni pingaartuuvoq nunanit tamalaanit namminneq kajumissutsimikkut sulisut angerlaraangata suut tamarmik unittuunnginnissaat”, Ulrik uparuaavoq.

Najukkami suliumassuseq tapersersortariaqarpoq

Kalaallit Meerartaasa Nuummi allattoqarfianni pisortap Julie Lynge-p isumaqatigaa, inooqatigiissutsikkut suliniutit  ingerlanneqarnerinnarminni sunniuteqarnerminniit ataavartumik pitsaasumillu allannguininngortittariaqartut ”Nalunngilarput aasaanerani katerisimaartitsisarnerit meeqqanut inuusuttunullu sunniuteqarluartartut aamma aasarsiortitsilluni sammisaqartitsinerit tamanut iluaqutaasumik najukkami inuiaqatigiinni ataatsimooqatigiinnermik misigititsisartut. Tamannalu ingerlaqqeriarnissamut aallaavissatsialaavoq”.

Kalaallit Meerartaat Kalaallit Nunaanni illoqarfinni nunaqarfinnilu 2014-imiilli aasaanerani katerisimaartitsisarpoq. Tamanna kommunit, najukkami suliffeqarfiit peqatigiiffiillu akornanni suleqatigiilluarnermik kinguneqartarpoq, innuttaasullu allat aamma peqataasarput, ikiuullutik sammisaqartitsinernullu peqataallutik. Julie Lynge-lu naapertorlugu piumassuserlu tamanna inooqatigiissutsikkut allannguinermut annertunerusumut alloriarfiusinnaavoq. Piffissami aggersumi Nanortalimmi malitseqartitsilluni ataatsimiittarnissat pilersaarutaapput, suleqatigiinnerup pioreersup ingerlaqqinnissaanut patajaallisarnissaanullu periarfissat misissorniarlugit: ”Neriuppugut najukkami inuiaqatigiit suleqatigalugit ataatsimooqatigiiffiit sammisassaqartitsinerillu pilersissinnaallugit, tamannami minnerunngitsumik Nanortalimmi meeqqatut, inuusuttutut ilaqutariittullu inuunerup pitsaasup patajaallisarnissaanut pingaaruteqaqaaq”.

KALAALLIT MEERARTAANNI SULINIUT NUTAAQ: ’Ikioqatigiinneq’ sumiiffinni ataasiakkaani inuiaqatigiinni pisariaqartitat namminnerlu kajumissutsimikkut sulisut aallaavigalugit ineriartuaassaaq, minnerunngitsumillu meeqqanut, inuusuttunut ilaqutariinnullu eqqugaaqqajaasunut sammisaqartitsinernik suliniutinillu ingerlallualersitsisunik pilersitsiffiulluni. ’Ikioqatigiinneq’ SOS Børnebyerne suleqatigalugu inerisarneqarpoq 2023-milu aallarnisarneqassalluni – aallaqqaammut Nanortalimmi Kullorsuarmilu.

Annertunerusumik paasissutissaqarpoq uani

FILMI TAKUUK: Aasaanerani katerisimaartitsinerit meeqqanut sunniuteqartarput. “I learned social skills and to be more open”, meeqqat peqataanikut ilaat filmimi ataaniittumi taama oqarpoq.