Timikkut tarnikkulluunniit ajoqusernerit kinguaariit tulliinut sunniuttarput
Kalaallit angajoqqaat ilaat namminneq peroriartornerminni sumiginnagaasimanermik suliarinissaannut ikiorserneqarnikuunngisaannarput. Meeraanermi timikkut tarnikkulluunniit ajoqusersimanernit kingunipilutsitsinerit inunni ataasiakkaani ingerlanerliornermik pilersitsisarput ilaqutariillu tamaasa sunnertarlugit. Aarhusimi Kalaallit Illuanni Ilaqutariit Sulliviat neqeroorutaavoq, angajoqqaanut ilaqutariinnullu kalaallinut, timikkut tarnikkullu ajoqusersimanerit suliarineqarnikuunngitsut matoorneqaannarnikullu kingunipiluutaannik atugaqartunut.
Ilaqutariit Sullivianni ilaqutariinnut neqeroorutit arlaqarput, matumani pineqarlutik angajoqqaat, inuunerup namminneq inuunererusutamik meeqqamillu inuunerisassaattut kissaatigisamik piviusunngortinnissaannut, peroriartornerminni namminneq misigisarsimasaminnik akimmiffeqartut. Sumiginnaanerup aamma timikkut tarnikkullu ajoqusernerup inuit ataasiakkaat kisiisa eqqortanngilaat, aammali kinguaariit tulliinut sunniuttarlutik. “Taamaammat oqartarpugut kinguaariit akimorlugit timikkut tarnikkullu ajoqusertoqartartoq”, Aarhusimi Kalaallit Meerartaanni meeqqanut ilaqutariinnullu ilitsersuisartoq Helle Christensen oqaluttuarpoq. ”Taamaammat ilaqutariinnut tamarmiusunut neqeroorutinik pilersitsinissaq pingaaruteqaqaaq. Taamaaliornikkut pissutsit pitsaaanngitsut, timikkut tarnikkullu ajoqusernerit sumiginnagaanerillu kingunerisartagaasa kipitinnissaannut periarfissarissaarnerussaagut”.
“Angajoqqaat sumiginnagaanermik aamma timikkut tarnikkullu ajoqusigaanermik misigisaqarnikuusut, kissaatigikkajuttarpaat imminnut – minnerunngitsumillu meeqqaminnut – tunngatillugu oqaluttuap nutaap pitsaanerusullu pilersinnissaa”, Helle Christensen, Kalaallit Meerartaanni meeqqanut ilaqutariinnullu ilitsersuisartuusoq, oqaluttuarpoq.
Ilaqutariit Sulliviat sammisassanik neqeroorutinillu assigiinngitsunik periarfissiivoq; siunnersuineq ilitsersuinerlu, katsorsaataasumik oqaloqatigiinnerit, meeqqanik oqaloqateqarnerit aamma pinnguarneq iluaqutigalugu katsorsaaneq, taamatullu timi atorlugu aalariaatsit assigiinngitsut, timikkut sianiuteqarfiit ilungersortitaavallaarnikut stresseqarunnaarsaatigisinnaasaat. ” Ilaqutariit Sulliviata pikkoriffiisa ilagaat, assigiinngitsunik suliaqartuugatta assigiinngitsunillu pisinnaasaqarluta. Taamaalilluta inummik ilaqutariinnillu tamakkiisumik sullissisinnaavugut”, Helle Christensen naggasiivoq.
Ilaqutariit Sulliviat ukua suleqatigiissutigivaat: Aarhusimi Kalaallit Illuat, TUBA, Center for ADHD aamma Kalaallit Meerartaat. Suliniut Danmarkimi Social- og Boligstyrelsimit aningaasalersugaavoq.
Ilaqutariit Sulliviat pillugu annertunerusumik paasissutissaqarpoq uani