Estheri tikilluaqquarput

Esther Arens Nuummi allattoqarfimmi suliniutinut inerisaanermullu siunnersortitut atorfinippoq pingaarnertullu suliassarissallugu illersorteqartitsisarneq ”Najorti”. 

Esther meeqqanut, isumaginninnermi siunnersortinut meeqqanillu illersuisartunut attaveqartassaaq, sulissutigissallugulu meeqqat isumaginninnikkut suliamut ilaalersut illersuisoqartinneqarnissaannik neqeroorfiginissaat. Tamatuma saniatigut Estherip suliarisassavaa meeqqanik illersuisartut ilinniartinneqarlutillu ilinniarteqqinneqartarnissaat ilinniartitsinermillu atortussat inerisarneqarnissaat. 

Sooq Kalaallit Meerartaanni atorfik qinnutigiviuk? Inunnik sullissinissaq soqutigijuartuuara ilinniartitsinerlu nuannarilluinnarlugu. ”Najorti”-nik suliaqarninni tamaasa sammisassavakka 

Siornatigut misilittakkatit, atorfigisimasatit suliarisarsimasatillu suut Kalaallit Meerartaanni sulininni iluaqutigisinnaavigit? Siusinnerusukkut Royal Greenlandimi sulivunga. Tassani meeqqat pisinnaatitaaffii pillugit aallartitaavunga, sinerissamilu suliffissuarni sulisunut meeqqat pisinnaatitaaffii pillugit pikkorissartarlugit. 

Suliartoraangavit suut kajumilissutigisarpigit? Suliartornissannut kajumilissutigisarpakka suliffimmi erseqqissumik anguniagalimmi suliffeqarnera aamma suliffimmi avatangiiserissaartumi sulinissara. Assigiinngitsunik piginnaasalinnik suleqateqarneq aamma suleqatigiit assigiimmik anguniagallit akornanni sulineq nuannarisarpakka. 

Kalaallit Meerartaanni ullormi siullermi sulinissanni suut qilanaarivigit? Suliffiup, suleqatima suleqatigisartagassamalu ilisarilernissaat qilanaarivakka  - neriullungalu meeqqat artornartorsiortut ilaannut allanngueqataasinnaallunga.