”Qallunaat inuusuttut inuusuttunit kalaallinit ilikkagaqarsinnaapput”

Siammartoq kalaallinut inuusuttunut attaveqaataalluarnermi saniatigut, aamma tassaavoq ilinniarluni ingerlatsineq, inuusuttunik piginnaaneqalersitsillunilu sakkussaqalersitsisoq, inuunerminni sammivissinnissaannut atorneqarsinnaasunik. Pikkorissartut arlallit inuunerminni sumiginnagaanermik, atornerlugaanermik kiserliornermilluunniit misigisaqartarsimapput. Siammartoq peqataasunut arlalinnut tassaavoq inuunermi kapitalimik nutaamik aallartitsineq, piginnaasaminnik atuilerfiat, ilaatigut kattuffinni namminneq kajumissusertik naapertorlugu sulisuni sungiusarluni sulineq aqqutigalugu. Maannamut taamaallaat kalaallinut inuusuttunut neqeroorutaanikuuvoq, maannali Siammartumi holdi inuusuttunik qallunaanik kalaallinillu inuttaqarpoq.Allaanerusunik naapitsineq pingaartuuvoq”Nutaajuvoq”, meeqqanut siunnersorti Helle Skriver oqaluttuarpoq. ”Suliniaqatigiiffiuvugut meeqqanut inuusuttunullu kalaallinut neqeroorutinik suliniutinillu pilersitsinissanik qitiutitsisoq, kisianni inuusuttunik qallunaanik peqataatitsinitsinnut pissutaavoq, isumaqaratta pingaaruteqarsinnaasoq inuusuttunik kalaaliunngitsunik illuatungeqarnissaq. Imaassinnavoq isumaqartoqartoq assigiiffiit annertunngitsut, kisianni allaanerusunik naapeqateqarnermi arlalitsigut assigiiffeqarneq paasineqalersarpoq. Isumaqarpugut tamanna pingaarutilimmik misilittagaalersinnaasoq, inuusuttunit kalaallinit qallunaanillu arlaatigut atorneqarsinnaasoq.Nipaallisimanissaq inissaqarpoqSarah Gyldenløve 19-inik ukioqarpoq, qallunaallu inuusuttut marluk Siammartumut peqataasut aappaaralugu. Peqataasut amerlanersaasa kalaaliunerat soqutaatinngilaa. Sarah oqaluttuarpoq: ”Taamaallaat weekendimi siullermi kikkut tamarmik ittoorput. Kalaallit inuusuttut amerlanersaat allatigut imminnut ilisarisimareerput, taamaammat ernummatigingaluarpara avissaartuutissasugut, kisianni taamaanngilluinnarpoq. Tamatta ataatsimooqatigiilluaqaagut”. Ataatsimooqatigiinneq Siammartamut tunngatillugu Sarah-p ersersinniagaasa ilagaat: ”Ataatsimooqatigiinnermi immikkut ittut ilagaat, namminiusinnaaneq inissaqartinneqarmat, aamma ataatsimoorluta nipangersimaarsinnaavugut. Isumaqarpunga tamanna kalaallit immikkut piginnaasarigaat”. Sarah itisiliivoq: ”Inuusuttut qallunaaginnaat ataatsimooqatigigaangakkit, misigisarpara oqaluttoqartorujussuusartoq nipituumillu oqaluttoqartartoq, aamma arlaatigut pingaaruteqartartoq peqatigisanut kinaanerup ersersinnissaa. Siammartumi allaaneruvoq. Maani peqatigisanut kinaanerup ersersinnissaa pisariaqanngilaq, uaguuginnarpugut. Aalajangersimasumik pissusilersornissaq allanit aalajangersimasunilluunniit pisinnaasaqarnissaq ilimagisaanngilaq. Naammappoq peqataagaanni”.Ineriartornissamut toqqissisimaneq pinngitsioorneqarsinnaangilaqSarah-p sumiginnagaaneq aamma angerlarsimaffimmi nukissaqarpianngitsumi peroriartorneq nalunngilluarpaa. ”Tamatta peroriartornitsinni artornartunik misigisaqarnikuuvugut”, Sarah oqaluttuarpoq. Tamatuma aammattaaq kinguneraa, assersuutigalugu paaqqinniffimmi najugaqarsimaneq pillugu imaluunniit inorsartutut misigisarnerit annertuumik ammaffigineqarmata. Imminut pilluni isummereersimaneq atorneqanngilaq, aamma suulluunniit oqallisiginissaat toqqissisimanarpoq. Arlaannaalluunniit allaanerunngilaq. Kikkut tamarmik akuerisaapput”, Sarah oqaluttuarpoq, isumaqarlunilu toqqisissimaneq ineriartornissamut pinngitsoorneqarsinnaanngitsoq:”Tamanna uannut pingaarnerpaat ilagivaat. Toqqissisimanerma assersuutigalugu kinguneraa ilinniarnitsinni oqaaseqarnissamut sapiissuseqalernera - aamma Siammartup kingorna piumasara malillugu ingerlaqqeriarnissamut sapiissuseqalernera. Februaarimi Københavnimi ilinniartitsisutut ilinnialissaanga, ilinniarnermalu nalaani suliffeqarnissara pisariaqartippara. Suliffeqarneq siusinnerusukkut uannut ajornakusoornikuuvoq. Misigisarama sorpassuit piviusunngortissinnaasariaqarlugit. Tamatuma suliffissarsiornissannit tunuarsimaartinnikuuvaanga, maannali isumaqarpunga tamanna saperunnaarlugu, Sarah oqarpoq, isumaqarlunilu inuusuttut qallunaat inuusuttoqatiminnit kalaallinit arlalinnik ilikkagaqarsinnaasut. ”Nipangersimaqatigiissinnaaneq qallunaarpassuit sungiusimanngilaat, kisianni aamma isumaqarpunga allaanerusumik tunngaviusumik inoqatit tamattalu immikkut killissarisagut akuersaarneqartartut paasineqartartullu. Naaggaarneq ajunngilaq. Soorunami nalugaluarpara tamakku kalaallit immikkuullarissutigineraat, kisianni Siammartumi taamaappoq”. Siammartoq VELUX FONDEN-imit tapersigaavoq