Filmit & workshoppit

Filmit kalaallisut oqaasertallit ilaqutariinnik atugarliortunik sullissinermi atortussiat

Kalaallit Meerartaat Kalaallit Nunaanni suleqateqarluni marlunnik kalaallisut oqaasertalinnik filmiliortitsinikuuvoq ilinniusiortitsillunilu, sumiginnaasarnerup pitsaaliornissaanut tunngasunik: Takusinnaaviuk? – kingusinnerusukkullu angajoqqaajunermut tunngasunik: Ikioqatigiitta? Filmit sulisunut meeqqanik ilaqutariinnillu sullissisunut atortussiaapput.

Filmi ’Ikioqatigiitta’ Kommune Kujallermi Qaqortumi ilaqutariinnik sullissiviup kissaateqarnerata kingorna suliaavoq. Taamani borgmesteriusoq Jørgen Wæver Johansen filmip pilersinneqarnera pillugu ima oqaaseqarpoq:

”Pitsaasumik angajoqqaajunerup qitiutinneqarnissaa oqallisiginissaalu pisariaqarpoq: ”Qaqortumi -  Nunatsinnilumi tamarmi – ilaqutariit meerartallit amerlavallaat ilinniarsimannginneq suliffeqarniarnikkullu ajornartorsiutit pissutigalugit isertitakippallaarnermik eqqugaaqqapput. Tamanna iliuuseqarfigisariaqarparput, sallerpaatilluguli meerartatta inuunerminni aallartilluarnissaat qularnaartariaqarparput, tamatumanilu angajoqqaajulluarneq iluatsitsisoqarnissaanut pingaarnersaavoq. Filmi qulequttat ajornakusoortut oqallisiginissaannut pitsaasumik aqqutissiuussisutut atorneqarsinnaavoq, ilaqutariillu ataasiakkaat misigitinneqarsinnaapput, ajornartorsiutit filmimi eqqorluartumik sammineqartut kisimiissunnagit”. Peqatigiiffiup Kalaallit Meerartaata innuttaasunik suliffeqarfinnillu suleqateqarnera, innuttaasut qanoq peqataatinneqarsinnaanerannut assersuutissatsialaavoq”. Jørgen Wæver Johansen 2015

Suliniut ukunannga tapiiffigineqarpoq: Namminersorlutik Oqartussat, Isumaginninnermut Inatsisinillu Atuutsitsinermut Naalakkersuisoqarfik aamma Edel og Wilhelm Daubenmerkls Almenvelgørende Fond.

Kommuunissinni workshoppertitsinissaq soqutigaasiuk – imaluunniit filmiit atorusuppisigit?

Meeqqanik sullissinermi siunnersuisartoq Helle Skriver Andersen emailikkut attavigiuk: hsa@fgb.dk sianerfigaluguluunniit:: +45 5164 7002

Filmit isiginnaakkit