Pinnguallaqqippit? – atuffassillaqqillutilluunniit?
Qaammammut marloriarlutit meeqqat peqatigalugit pinnguarnissamut, pilersitsiffiusunik sammisaqartitsinissamut, atuffassinissamut spil-ernissamulluunniit kajumissuseqarlutillu sinnilinnik nukissaqaruit – ilaanneeriarlutillu sapaatip-akunnerisa naanerini angalaaqataasarusukkuit, Aalborgimi Kalaallit Meerartaanni atorfissaqartippatsigit.
Marlunngornikkut ualikkut nal. 16.30-p 19.30-llu akornanni kalaallit ilaqutariit meerartallit Aalborgimi kulturip illorsuani Trekanten-imi katersuuttarput. Ilaqutariinnik meerartalinnik ilitsersuisartoq Phoebe Rafaelsen oqaluttuarpoq:
”Ilaqutariit nereqatigiittarput meeqqallu pinnguartarput ataatsimoornertillu nuannarisaqalugu, angajoqqaallu nerisassiornissartik eqqarsaatigisariaqarnagu katerisimaarujoorlutik nuannisaqatigiittarput. Akunnerit taakku pingaaruteqarlutillu nuannersuusarput, ataatsimooqatigiinnermik immikkut ittumik pilersitsisarlutik, tamannalu aamma sapaatip-akunnerata naanerini angalaarnitsinni malugisarparput”.
Sapaatip-akuunnerata naanerani angalaarnerni taamaallaat meeqqat peqataasarput, kisianni inersimasut amerlanerit meeqqanik isumassuisussat pisariaqartippagut.
”Pineqartup suliassai aalajangersimasuunngillat, kisiannili ilaqutariinnut meeqqanullu kalaallinut allanngueqataanissaminut kajumissuseqassaaq, tamatumunngalu arlalitsigut peqataasoqarsinnaavoq. Silami sammisaqartitsisoqarsinnaavoq, illup iluani meeqqat nuannisaqatigalugillu pinnguaqatigineqarsinnaapput. Aamma meeqqat atuffanneqarsinnaapput nipilersukkanilluunniit tusarnaaqatigalugit – imaluunniit nerisassiorluni. Assigiinngitsorpassuarnik periuseqarluni meeqqanut toqqissinartut pilersinneqarsinnaapput nuannersunillu misigisaqartillugit”.
Aalbogimi meeqqanut ilaqutariinnullu kalaallinut allanngueqataarusuppit? Marlunngornerillu tamaasa imaluunniit marlunngornerit allortarlugit piffissaqarpit – imaluunniit ilaanneeriarlutit sapaatip-akunnerata naanerani angalaaqataasarsinnaavit?
Meeqqanik ilaqutariinnillu ilitsersuisartumut Phoebe Rafaelsenimut sianerit allallutilluunniit Kalaallillu Meerartaanni nammineq kajumissuseq naapertorlugu sulineq pillugu paasiniaallutit. Telefon +45 5146 0337 imaluunniit mail: pr@fgb.dk